Ka sien ba nyngkong bad ka sngi ka ban sah kynmaw na ka bynta ki paid ieid phutbol jong ka jylla ha kaba ka kynhun ialehkai phutbol jong ka India (senior Team) ki la wan ban ialehkai ha kane ka jylla, kata ha madan Jawaharlal Nehru Stadium, Polo Shillong ha kaba la ioh ban sakhi ia ka jingialehkai paralok (FIFA international friendly) ka India pyrshah ia ka Maldives kynthup ruh ia u Sunil Chhetri uba dei ruh u rangialehkai ba paw ha ka pyrthei bad uba la bteng biang ban ialehkai hadien ka rai shongthait ha u snem ba lah dep.
La ioh nam ia ka jylla Meghalaya kum ka jylla kaba ieid tam ia ka jingialehkai phutbol ha ka Ri baroh kawei. Dang shen la pynlong ruh ia ka lympung Durand Cup bad Indian Super League ha kane ka jylla bad ha kane ka kynti, ki nongialam ka All India Football Association (AIFF) ki la jied sa shisien ia kane ka jylla ban pynlong ia ka Meghalaya ka jaka pdeng jong ka Phutbol ha India da kaba pynlong ia ka jingialehkai paralok ba nyngkong eh mynta u snem bad ka jingialehkai ba nyngkong jong u Chhetri hadien ba la wanphai sha ka kynhun.
Naduh ka por 12 baje, la sakhi ia ka jingtuid jong ki paidbah ban iaknieh tiket ha Golf Club Polo Shillong bad sdang ruh ban ap laiñ lypa ha madan na ka bynta ban ioh sakhi ia kane ka jingialehkai kaba heh ha ka sien ba nyngkong eh.
Ka jingialehkai ka long kaba shongshit bad kaba la pynum ia ka dohnud jong ki paid ieid phutbol. La sakhi ruh ia ka jingkmen jong kiba bun khamtam ban iohi ia u Chhetri ba un phong biang ia ka jersey India. Kawei na kaba kham diaw ka long ba ka Shillong kam don ia ka madan baheh kaba lah ban ñiam shibun ki briew hynrei ka Sorkar ka la pyndonkam da kawei pat ka buit na ka bynta kito kiba la duh tiket bad ki bym lah ban poi namar ka jingjngai, kata da kaba pyni LIVE SCREEN ha bun tylli ki jaka kynthup ha Madan Heh, Mawlai Shillong, Malki Ground Shillong, Umpling Football Ground, Shillong, Madan Student, Jaiaw Shillong, Madan Jingkieng, Nongthymmai, Laban Assam Club, Nongstoin, Jowai, Sohra, Williamnagar, Ri Bhoi bad ha Baghmara Garo Hills.
Haba phai sha kane ka jingialehkai, ka jingiakhun ha ka kylla step ka long kaba kham noh shilliang ha kaba ka India ka la ioh ban thep shi kol tang ha ka minit ba 34 lyngba ka kol u R. Bheke. Tang hadien ba bteng ka kylla miet ka jingiakhun ka la kham pher na ka jingioh ka India shi kol hynrei namar ban bishar katkum ka jingialehkai, ka India ka kham khlaiñ shibun. U Colaco u la ioh ban thep sa shi kol na ka bynta ka India ha ka minit ba 66 bad ryngkat ka jingaimynsiem ki paidbah ka India ka la ioh sa shi kol lyngba u Sunil Chhetri ha ka minit ba 76. Ka jingiakhun ka la kut noh da 3-0.
Ka India kan bteng biang ia ka jingialehkai ha Shillong pyrshah ia ka Bangladesh kaba dei ruh ka jingialehkai ban iaknieh na ka bynta ban ioh rung sha ka lympung AFC Asian Cup ha ka 25 tarik mynta u bnai ha kajuh ka madan.
