Ka jingiakhun na ka bynta ka lympung Shillong Premier League 2024-25 ka la poi noh sha kaba kut ha ka 15 tarik Lber 2025 ha kaba ka Shillong Lajong FC kaba dei ruh ka klob kaba la ioh ban khur bun tam ia ka nam lahduh jong kane ka lympung, kata ha ka snem 2014, 2015, 2016 bad 2019 ka la ïoh biang sa kawei pat ka nam mynta ka aiom da ka jingjop ia ka Mawlai SC kaba dei ruh ka kynhun kaba khlem mad ia ka nam rem mynta ka samoi.
Kane ka jingiakhun ha kane ka sngi ka long ruh kaba kham kyrpang watla ka dei ka league hynrei namar ka jingduna poiñ jong ka Mawlai bad ka jingsah sa mar kawei ka jingiakhun, hynne ka sngi ka jingiakhun ka la long kum ka program ba la pynbeit kum ka phainal ha kaba ka Lajong ka donkam ban ioh 3 poiñ katba ka Mawlai ka donkam tang 1 poiñ ban ioh rah ia ka nam lahduh.
La sakhi ia ka jingshlei jong ki paidbah ha kane ka jingiakhun kaba kynthup ruh ia ki rangialehkai ka India (senior) kiba la wan poi ha kane ka Jylla na ka bynta ban ïakhun pyrshah ia ka Maldives ha ka 17 tarik mynta u bnai ha madan Jawaharlal Nehru Stadium Polo Shillong.
Ka Mawlai kaba dei ka lahduh jong kane ka lympung ha ka samoi ba lah dep ka la ïalehkai da ka buit ban lait shah thep (defensive) na ka bynta ban ioh kamai tang shi poiñ hynrei na katei ka jingbakla ban jied ia ka buit ialehkai, ka Lajong ka la shim kabu bad thep shi kol tang ha ka minit ba 10 lyngba u Abhay Chhetri da ka jingïarap buh bol (Assist) jong u samla Riborlang Lyngkhoi. Hadien katei ka shi kol, ka Mawlai ka la pynkylla noh ia ka buit ialehkai ban sdang ban ñion na ka bynta ban ioh pynphai ia katei ka shi kol hynrei namar ba ki rangialehkai ka Lajong ruh ki khlem aili ban pynphih jar ka jingiakhun ha ka kylla step ka la kut da 1-0.
Hadien ka kylla step, ka jingiakhun ka la kham khluit bad ki nongkyrshan jong baroh arliang ki la pyni lang ia ka jingdom da kaba kawang da ki bilor um ha madan. Lyngba ka jingiakhun ba jwat, ka Lajong ka la ioh sa shi kol ha ka minit ba 76 lyngba u Samchaphrang Lato. Watla ka Mawlai ka la shah thep 2 kol hynrei la sakhi ba ki khlem randien bad ïakhun hi triang da ka thong ban ioh ia ka jingjop. Dei ha ka minit ba 88, ka Mawlai ka la ioh ban pynphai shi kol lyngba ka penalty ba la thep da u Damanbhalang Chyne. Hadien katei ka kol ka Mawlai ka khlem ioh shuh ban pynphai bad ka jingiakhun ka la kut noh da 1-2.
Ryngkat ka trophy ka Lajong ka la ïoh ruh ban khur ia ka song Pisa kaba 6 lak. Da kane ka jingjop ka Lajong ka la kylla long ruh ka klob ba nyngkong ha kane ka lympung ban ioh khur haduh 5 sien kum ka lahduh.
