Ka Klob Langsning SC ka la ioh ban rah ia ka nam lahduh jong ka Lympung Shillong Premier League (SPL) mynta ka aiom, kata hadien u snem 2018 ba ki la ioh ban khur ia kane ka khusnam ba heh. Katei ka jingioh kabu jong ka Langsning ban rah ia katei ka nam ka dei hadien ba ka Mawlai kaba dei ka lahduh jong u snem 2023, ka la iakhaid noh hynne ka sngi ka 20 Risaw 2025 ha ka jingiakhun pyrshah ia ka Rangdajied United FC ha Madan SSC Polo Shillong.
Ka Mawlai ka la iakhun tyngeh hynne ka sngi da ka jingkhmih lynti ban ioh khur 3 poiñ na ka bynta ban knieh noh ia katei ka Trophy na ka Shillong Lajong kaba dei ka lahduh jong une u snem ba lah dep, hynrei namar ka jingtbit ki snar ialehkai jong ka Rangdajied la pynpulom noh ia katei ka thong jong ki da ka jingiakhaid da 1-1 kol.
Ka Langsning ka la pynkut ia kane ka samoi da ka jingioh ban khur 20 poin na 9 sien ki jingiakhun katba ka Mawlai bad Lajong ki la iakhaid ha ka jingioh poiñ, kata mar 19 poiñ. Ka Malki bad Nongrim Hills ki dei ki kynhun kiba la shah pynhiar kyrdan noh sha ka SSA First Division ha ka samoi ban wan namar ka jingdon ha trai duh jong ka miej iakheiñ poiñ.
Lyngba katei ka jingjop, ka Langsning kan sa shah ban kyntiew kyrdan ha kane ka samoi ban wan, kata da ka jingioh ban iashim bynta sa ha ka Lympung Meghalaya State League.
