Ka long ka khubor kaba pynkmen bad kaba sngewsarong ban ioh ia ka khubor ba ka kynhun ialehkai phutbol jong ki shynrang (U-17) ka Myngken Christian Higher Secondary School, Ri Bhoi kin sa mih khmat ia ka India sha ka lympung baheh ia kaba la tip kum ka Indo-French Football Tournament ha Paris, France.
Hadien ka jingiaid lynti ka ba eh, kane ka kynhun ka la ioh ia ka kyrdan ba ar ha ka lympung jong ka 63rd State Level Subroto Mukherjee cup ka ba dang shu kut shen. Kine ki samla kiba don sap ki la sdang ia ki jinghikai (training) jong ki shuwa ba kin leit iashim bynta sha katei ka lympung ka ba heh ha pyrthei. Kane ka kynhun ialehkai kan mih na ka jylla sha Paris ha ka 24 tarik mynta u bnai.
Lyngba ka jingtrei shitom bad jingkut jingmut jong ki kaba la pynpoi ia ki haduh kane ka kyrdan, mynta ki la long kiba la kloi ban pynsngewsarong ia la ka ri bad ka jaitbynriew. Kane ka kabu kam dei tang ka bynta ka jingialehkai phutbol hynrei kadei ban mihkhmat na bynta ka Ri bad ka Jylla da ka jingsngew sarong sha ka pyrthei.
