Hadien katto katne tylli ki jingïalehkai ba ka Shillong Lajong FC ka la hap ban ïakhun shabar jylla bad mad ruh katto katne ia ka nam rem, mynta ka sngi ka 14 tarik Rymphang, kane ka kynhun ka la ioh ban pynkmen sa shisien ia ki nongkyrshan ka jylla ha kaba ki la thep haduh 4-0 pyrshah ia ka Sreenidi Deccan FC ha ka jingiakhun na ka bynta ka lympung I-League ba la pynlong da ka All India Football Federation (AIFF).
Ban nujor ha kiwei ki snem, ka Lajong ka la kham kiew shibun ha ka buit ialehkai, bad kane ka rukom ba thymmai ba la wanrah da u coach ba na spain, u Jose Carlos Rodriguez Hevia ka la pynktik shibun ia ki nongkyrshan ka Lajong ha kaba la pynlong ruh ia ka Lajong ban kham bun ki nongkyrshan.
Kane ka dei ruh ka sien ba nyngkong ba ka Lajong ka la jop da kaba suk ia ka Deccan ha kaba ki khlem lah ban pynphai wat tang shi kol ruh haduh ban da kut ka minit ialehkai.
Ia kitei ki saw kol, la ioh ban thep da u M. Rudwere Genar Silva (41& 72), u K. Kharshong (88) bad u Renan (90+3). Ka jingiakhun ha kane ka sngi ka la khluit shibun ha kaba ka Deccan ka la ioh shibun ki yellow card kynthup ruh ia u rangapkol na katei ka klob kaba na Hyderabad.
Hadien katei ka jingialehkai, ka Lajong ka la kiew biang ha ka kyrdan ba 5, kata da ka jingioh 22 poiñ na 14 sien ki jingialehkai.
