Watla ka jingiakhun hynne ka sngi na ka bynta ka klob Shillong Lajong FC la pynlong ha Fatorda Stadium Goa, ka Lajong ka khlem duh poiñ hynrei ka la ioh 1 poiñ ha ka jingiakhun pyrshah ia ka Dempo SC na ka bynta ka lympung I-League 2024-25.
Ha katei ka jingiakhun jong kitei ki 2 kynhun, ka jingialehkai ka la kut noh da 2-2. Ha ka kylla step, ka Dempo ka la ioh ban thep shi kol lyngba u M. Joseph ha ka minit ba 39 katba ka Lajong ka la ioh ban pynphai ia katei ka kol hadien ka kylla step lyngba u D. Gonçalves, kata ha ka minit ba 47. Katba ka jingiakhun ka dang sdang khluit, ka Dempo ka la ioh sa shi kol lyngba u M. Ali ha ka minit 52 kaba pynlong ruh ia kane ka kynhun ban tam shi kol ia ka Lajong.
Ban bishar katkum ka buit ialehkai, ka Lajong ka la kham pynbha shibun ha ka rukom ialehkai, kata naduh ki rangialehkai shadien (defender) haduh ki rangthep kol (striker). Na kane ka rukom ialehkai ba thymmai, ka Lajong ka la ioh ban pyniakhaid ia ka jingiakhun ha ka por kaba khlem poi pyrkhat kaba dei ruh ka minit ba khatduh ba la ai da u rephri (90+7), lyngba u Gonçalves.
Hadien ba kut noh ka wat ba 15 jong ka jingiatynjuh bor, ka Lajong mynta ka don ha ka kyrdan ba 5 bad ka don jingkyrmen shibun ban knieh ia ka kyrdan ba nyngkong na ka Churchill Brothers kaba la tam tang 5 poiñ haduh kane ka tarik.
