Ka kynhun ialehkai phutbol jong ka India hynne ka sngi ka la mad biang ia ka jingiakhaid ha ka jingiakhun pyrshah ia ka Bangladesh kaba dei ruh ka jingiakhun na ka bynta ka jingïaknieh ban ïoh rung sha ka lympung Asian Cup ka ban sa long ha Saudi Arabia, 2027.
Ka Bangladesh ka don jingkyrmen shibun ban ïalehkai bha bad ban khur ia ka jingjop ha kane ka jingiakhun na ka jingwan iasoh thymmai jong u Hamza Choudhury ha ka kynhun uba dei ruh u rangīalehkai barim ka klob Leicester City kaba don ha ka lympung English Premier League (England). Ka jinglong tynrai jong u Choudhury ka dei na ka Ri Bangladesh hynrei u la heh la san ha England bad don bynta ruh ha ka kynhun jong ka England (U-21) ha ka snem 2018-19.
Ka India ruh ka ioh mynsiem ha kane ka kynti na ka jingjied jong u Sunil Chhetri (Captain) ban don bynta biang bad ka kynhun, kata hadien ba la rai shongthait ha u snem 2024.
Ka India ka la shah kynthup lang bad ka Hong Kong, Bangladesh, bad Singapore ha ka Group C bad kane kadei ka jingiakhun ba nyngkong na ka bynta kane ka program ka AFC.
Haba phai sha katei ka jingiakhun, ka jingialehkai ka long kaba kham ïakhaid bor watla ka India ka tam ha ka kyrdan (rank) katkum ka jingkheiñ poiñ jong ka FIFA. Baroh arliang ki la ïakhun ban ioh pynkhih jar hynrei haduh ban da kut ka jingiakhun ym don ba lah ban thep kol, kumta ka jingiakhun ka la kut noh da kaba iasam mar shi poiñ.
Ka jingiakhun ka long kaba shongshit namar ka jingtuid jong u paidbah ban ioh sakhi ia ka jingialehkai ba nyngkong eh ka India – Bangladesh ha ka jylla. Ki paidbah ki angnud ruh ba u Chhetri un ioh thep kol ha kane jingiakhun na ka bynta ban iarap ruh ia ka India ban jam sha shilliang kane ka lympung. Kila don haduh 14,952 ki nongkyrshan kiba la wan ha kane ka sngi.
Ha kane ka sngi la wan ban don ryngkat ruh da u Myntri Rangbah ka jylla Conrad K. Sangma, President ka MFA Bah Hamlet Dohling, ki dkhot ka AIFF bad kiwei.
Ka India kan bteng biang ia ka jingiakhun na ka bynta ka jingïaknieh sha ka Asian Cup ha ka 10 tarik Jylliew bad ia ka jaka ban ïalehkai, ki nongpyniaid ka AFC kin sa pyntip kham hadien.
