Ka SCA ‘B’ kala jop da 2 wickets ïa ka SWKHDCA haka jingïalehkai jong ka Under-16 Boys Inter District Cricket Tournament 2025 (Zone-1) kaba la long mynta ka sngi saitjaiñ 3 tarik u Jymmang. Ïa kane ka lympung la pynlong da ka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, MukhlaMission, West Jaiñtia Hills District.
Haka jingïalehkai ïa ka jingkynting toss lajop da ka SWKHDCA kaba la kam trai ban tied shuwa. Ka SWKHDCA haba leit tied nyngkong ka la kamai 126 na ki 43 overs bad liem 9 wickets. U Phrangborlang Syiemlieh (C) ula long u nongtiedba paw mynta ka sngi napdeng ki nongtied jong ka SWKHDCA da ka ba tied marwei 50runs na ki 117 balls ryngkat san tylli ki Fours (4s). U Arav Baraily, unongkawang ball jong ka SCA ‘B’ u la ïoh ban pynhap 3 wickets na ki 10 overs.Ka SCA ‘B’ ha ka pali jong ka ban beh ïa kathong, ka la lah ban pynjop da kaba kamai 130 runs bad hap 8 wicket haka overs kaba 27.1. Dei ka jingïalehkai bha u Suraj Chettri ula ïoh ban tied marwei 94 runs na ki 75 balls ryngkat kawei ka Six (6) bad 12 tylli ki Fours (4s). U Gillford Iawphniaw, nongkawang ball jong ka SWKHDCA u la ïoh ban khyrwit 4 wickets na ki 4overs.
Ka jingïalehkai mynta ka sngi ka long kaba khadduh ha ka League Stage jong ka Under-16 Boys Inter District Cricket Tournament 2025 (Zone-1). Na ka Group A, ka SCA ‘B’ ka ba joplut baroh ki jingïakhun ka la long nyngkong ha ka Points Table da ka ba ïoh 8points. Ka EJHDCA ka la wan ba ar da ka ba ïoh 5 Points. Na ka Group B, ka RBDCA ruh ka ba jop lut baroh ki jingïakhun ka la long nyngkong da kaba ïoh 6point bad EKHCA ka la wan ba ar da ka ba ïoh 4 point. Na ka Zone-1 ki Teams ba ïohban rung sha ka Semi Final ki dei ka SCA ‘B’ kaba dei ka top team na Group A,ka RBDCA ka ba dei ka top team na GroupB bad ka EKHCA ba ïoh best NRR. Na ka Zone-2 pat ka Team ba ïoh ban rung sha kaSemi Final ka dei ka TDCa ka balong ka top team.
Ka SCA ‘B’ kan ïakhun pyrshah ïaka EKHCA haka Semi Final ka ban long ha ka Zone-1 Jowai (Mukhla) haka sngi nyngkong (Monday)05-05-2025 naduh ka por 8 baje shiteng mynstep. Katba ka RBDCA kan ïakhun pyrshah ïa ka TDCa ha ka Semi Final ka ban long ha ka Zone-2 Mendipathar haka sngi nyngkong (Monday) ha ka juh ka por. Ïa ka jingïakhun Final jong kane ka Under-16 Boys Inter District Cricket Tournament 2025 yn pynlong ha Jowai (Mukhla) ha ka sngi Wednesday, 07-05-2025.