Ha ka jingiakhun Final ka 1st Women Football Tournament 2025 hapdeng ka 7 Wasa United bad ka Carpe Diem kaba la pyniaid da ka West Jaintia District Sport Association kaba la long hynne ka sngi ha Madan Kiang Nangbah Stadium, Jowai, ka 7 Wasa United ka la pylliem ia ka Carpe Diem da 2-1 kol.
Ha shwa ban sdang ka jingialehkai la pynlong ia ka jingialang kaba lyngkot hapoh ka jingpyniaid jong u Waheh Patrick Lamare, Vice President ka West Jaintia District Sport Association, u ba la ai ia ka jingkren pdiang sngewbha bad ka jingpdiang burom ia u Kongsan Waheh S.Kmen Lato.
U Waheh S.K.Lato haba kren ha kane ka sngi u ong mynba sanphew snem mynshwa shwa ban mih ka Jaintia District Sport Association, ia kane ka Seng la shu tip ka Jowai Football Association bad kaba pyniaid tang ia ka jingialehkai football, mynta haba la Seng ia ka Jaintia District Sport Association ka la plie lad ym tang ia ka jingialehkai football, hynrei ha baroh ki jait jingialehkai (Sports and Games) bad u pynpaw ka jingkmen ka bakhraw ban iohi ba ki khun samla Shynrang bad Kynthei ki la kiew shakhmat ha ki jingialehkai Sports bapher bapher bad u kyntu ia ki Nongialehkai jong ki artylli ki Team 7 Wasa United bad Carpe Diem ban ialehkai bha ka ban pynsngewtynnat ia ki Nongpeitkai bad ia ki riewialehkai football.
Hapoh ka jingpyniaid jong u Savio Tariang (Referee) ka jingialehkai football ka long kaba iaid beit iaid ryntih. Ki Nongialehkai na baroh artylli ki Team ki la ialehkai bha da kaba pyni iala ki sap ki Talen (Energetic Talent) ialehkaiball kaba la pynkmen bad pynsngewtynnat ia ki Nongpeitkai. Katba ka jingialehkai ka dangiaid, ki nongialehkai ki la sdang ban ia khynniat kawei ka liang ia kawei pat ka liang, hynrei pat hadien ba u Refree u la ai YELLOW CARD ia ka Nongialehkai No 19 jong ka 7 Wasa United, ka jingialehkai ka la long kaba jaijai bad kaba itynnat haduh kaba kut jong ka por.
ïa kitei ki ar kol na ka 7-Wasa United la thep da ka Amethis Darnei haka minit ba 59 bad ka Nidaroiki Biam haka minit ba 60+3. Katba ïa ka shikol na ka Carpe-Diem la thep da ka Deigracia Dan haka minit ba 49.
Ïa ka nam Player of the Match la jop da ka Nidaroiki Biam naka 7-Wasa United, Top Scorer la ïoh da ka Daphimon Khyriem naka Ladthadlaboh, Best Goalkeeper la ïoh da ka Nangpyniarbha Ryngkhlem naka 7-Wasa United, katba ïa ka nam Player of the Tournament la ïoh da ka Baiarbha Nongrum naka Carpe-Diem.
Ïa ki khusnam sha ki nongjop la sam da u kongsan jong kane ka sngi u ma S.K. Lato uba dei u Founder Member ka JDSA, ha ka jingdonlang ki nongkitkam ka WJDSA nalor kiwei de.
Ha kane ka jingialehkaiball Final jong ki Kynthei ka 7- Wasa United ka la pynbam 2 Kol la 1 ia ka Carpe Diem bad ka la iohrah ia Cup Champion bad ka song Peisa kaba Rs 20,000 hajar tyngka katba ka Carpe Diem ka iohrah ia ka Cup rem bad ka song Peisa kaba Rs.10,000 hajar tyngka. Hadien ba la sam ia ki Buskit bad ka song peisa bad kyntang iawai la ioh ia ka jingkren ai khublei da u Waheh R. Lamare Executive Member ka West Jaintia Distrtict Sport Association.
