Ka Sports & Youth Sub Committee ka War Jaiñtia Students’ Union (WJSU) ha kane ka 27 tarik kala pynlong ïa ka Friendly Match hapdeng ka Langsning FC, Shillong bad ka Amlarem SC, Amlarem (Warjaiñtia Champion 2025) ha madan League (Shinglamin Ryngksai) Football Ground, Dawki.
Ïa ka Langsning FC, Shillong la ïalam da u Head Coach bah Khainpyrkhat Syiemlieh bad ka Champion jong ka First Warjaiñtia Invitation Football Tournament 2025 la ïalam da u President ka Club bah Dikermen Surong.
Ha kane ka sngi u Henry Manner, President Ka Warjaiñtia Owner & Drivers Truck Association Amlarem ula long kum u Kongsan, ha kaba u ma Army Lipon President Synjuk Waheh Shnong Ri Jaiñtia kum u Symbud kongsan, u ma Phrangki Buam Prominent Football ka Warjaiñtia uba long ruh u Rangïalehkai Indian League (National Figure) ula long kum u Special Guest. La wan ban pynshngain lang ha kane ka phutbol da ki ba bun ki Riew pawkhmat ka thaiñ Warjaintia Dawki.
Ka jingïalehkai hapdeng kine ki artylli ki team ka Warjaiñtia champion 2025 bad Shillong ka long kaba itynnad bha. Ha ka kylla step ka jingïalehkai ka long kaba ïakhaid bha khlem da don ban pynkhih jar.
Ha ka kylla miet ka Amlarem SC (Warjaiñtia Champion) ka la ïaleh tyngeh bad ka lah ban pynkhih jar nongkong da u Marshal Nongrum haka minit ba 37, 39, Ha ka minute ba 52 la ïoh ban pynkhih jar biang da u Pdianghun Suting, da kine ki 3-0 ki kol, ka Amlarem SC (Warjaiñtia Champion 2025) kala pynliem ïa ka Langsning FC, Shillong.
Ha kane ka program Friendly Match hapdeng ka Langsning FC, Shillong bad ka Amlarem SC (Warjaintia Champion) la pynïaid ïa ka jingïalang da u Autumn Sumer, Senior Vice President ka seng, la ïoh ïa ka jingkren na u Samla Everest R Langstang, General Secretary, WjSU Central Body, Amlarem.
U samla Everest Langstang u pynpaw ka jingsngewnguh ïa ki nongpynïaid ka Langsning FC, Shillong kiba la kloi ban wan ïalehkai paralok mynta ka sngi. U kyrmen skhem kane ka jingwan kane ka prominent Football Club jong ka sor Shillong kan ai mynsiem shikatdei eh ïa kine ki Player ka Warjaiñtia kiba ialehkai mynta ka sngi.
U la pynpaw pyrthei ba ki nongïalam ka seng ki trei borbah ban kyntiew ïa ka thaiñ ha baroh ki liang wat lada poi u pud ban ïakhih ha surok ne wat hapoh Along. Namar ka nongrim ka seng ka long ban shakri ïa ka thaiñ Warjaiñtia bad shabar kumjuh ym tang ha Amlarem Civil Sub-division hynrei ha kino kino ki bynta jong ka Jylla bad ka pyrthei.
Na ka liang u ma Army Lipon, President Synduk Waheh Chnong Ri-lum Jaiñtia, u la ïaroh ïa ka jingtrei shitom borbah ka seng WjSU bad u ai mynsiem ïa ka seng ban nang minot shuh shuh ban shakri ïa ka thaiñ Warjaintia.
Na ka liang u Henry Manner, kum u kongsan haba ai jingkren ula ïaroh ïa ki sien jam ka Wjsu ban kyntiew ïa ka Ri Warjaiñtia bad u kyntu ïa ki players ban don ka Sportsmanship bad Discipline bad ban lait na ki jingdih pynbuaid khnang ban kiew hala ka jingim.
Ha kaba khatduh, na ka liang u Sports and Youth Secretary ka WjSU, u samla Deilang Syad, ula ai khublei ïa baroh kiba la wan ban ai ka jingkyrshan ïa ka seng.
U Samla Syad ula pynbna ruh ba na ka liang ka Sports and Youth Sub Committee ka seng, kan pynlong ïa ka First Warjaiñtia Junior Championship Under-16 Football Tournament 2025 ha shnong Pamtbuh Amlarem Civil Subdivision ha ka taiew ba khatduh u bnai October 2025. Ka Sub Committee ka seng kan pdiang 8 tylli ki team na kawei kawei ka thaiñ jong 4 tylli ki thaiñ ka Warjaiñtia baroh kawei.
U Samla Syad, u la pynbna ruh, na kane ka Junior Championship Under-16 ka Sub Committee kan jied 32 ngut ki player ba kynsai, ban phah pyntbit ïa ki ha ka SAI Training Centre, NEHU Permanent Campus, Shillong bad kan ai ki platform khnang ba ki rangïalehkai ka Warjaiñtia kin pawnam bad im ja na ka kam ïalehkai phutbol bad ban saiñdur ïa ka lawei ba phynnai jong ki.
