Ka EKHCA kala jop da 6 Wickets ïa ka EWKHDCA haka jingïalehkai jong ka Under-16 Boys Inter District Cricket Tournament 2025 (Zone-1) kaba la long mynta ka sngi 2 tarik u Jymmang.
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Ha ka jingialehkai mynta ka sngi ïa ka jingkynting toss la jop da ka EWKHDCA kaba la kam trai ban tied shuwa. Ka EWKHDCA haba leit tied nyngkong, ki nongtied jong ka kila tied tang 84 runs bad liem lut baroh 10 wickets ha ka overs kaba 24.5. U Andrew Starfield Rani 31 (49) bad u Welldone Marngar 20 (29) ki la long tang ma ki arngut napdeng ki nongtied jong ka EWKHDCA kiba kham lehbha mynta ka sngi. U Pynkhraw Jomati bad u Menang Shangpliang, nongkawang ball jong ka EKHCA ki la ïoh ban khyrwit mar 3 wickets.
Ka EKHCA ha ka pali jong ka ban beh ïa ka thong, ki nongtied jong ka ki ba mih madan mynta ka sngi ki la lah ban pynjop da kaba ïoh 85 runs tang ha ka over kaba 18.3 bad liem 4 wickets. Napdeng ki nongtied jong ka dei u Menang Shangpliang 31 (49) bad u Danlyson Bareh 28 (37) kiba ïalehkai bha. U Jopshwa L Mawnai, nongkawang ball jong ka EWKHDCA u la ïoh ban pynhap 3 wickets na ki 8.3 overs.
Ka jingïalehkai mynta ka sngi ka long ka jingïalehkai ba khadduh jong baroh ar kine ki Teams na ka Group B (Zone 1), ka EKHCA kala jop ar sien bad rem shisien na ki lai tylli ki jingïalehkai bad ka long ba ar ha ka Points Table. Ka EWKHDCA pat ka jop shisien bad rem arsien na ki lai tylli ki jingïakhun bad ka long balai haka points Table.
Ka jingïalehkai lashai ka sngi, Saitjaiñ 03-05-2025 kan long hapdeng ka SCA ‘B’ pyrshah ïaka SWKHDCA naduh ka por 8 baje shiteng mynstep.