Ka lympung ïalehkai phutbol jong ka ‘Joybell Suiam Memorial 2nd Division Football League bad ka ‘Kesilroy Pala Memorial Super Division bala pynïaid da ka Thadlaskeiñ Sports Association (TSA) West Jaiñtia Hills kaba la long mynta ka sngi 5 tarik u Nailur ha madan Wahiajer Multi-Sports Complex.
Haka jingïakhun ba nyngkong jong ka 2nd Division ka Lumkynsaw kala pynliem da 5-0 kol ïaka Thadmyni. Ïa kitei ki kol naka Lumkynsaw la thep da u Arman Lamare haka minit ba 12, u Hamebanjop Suting haka minit ba 24 & 42 bad u Tyngshain Nongrum haka minit ba 53 & 69.
Haka jingïakhun kaba ar hapdeng ka Namdong-A bad ka Maskut kila poi sha ka jingïakhaid khlem don kiba ïoh ban thep kol (0-0).
Haba phai pat sha ka jingïakhun jong ka Kesilroy Pala Memorial Super Division hapdeng ka Nongkhroh Rim bad ka Mukhla Raij kila poi sha ka jingïakhaid da mar shikol (1-1). Ïa ka shikol na ka Nongkhroh Rim la thep da u Rahbok Synnah haka minit ba 18, na ka liang ka Mukhla Raij la thep da u Lakhon Surong haka minit ba 49.
La pyntip ba ka jingïakhun kan bteng haka 06/09/2025 haka kyrdan ‘Joybell Suiam Memorial 2nd Division Football League haka por 9 baje mynstep ka United Phyllong Iingkhaw pyrshah ïaka Mukhla Sohshrieh. Ha ka por 11 baje mynstep ka Mukhla Veteran pyrshah ïaka Mukhla Mission.
Katba haka kyrdan jong ka Kesilroy Pala Memorial Super Division haka por 1 baje nohphai sngi ka Niriang pyrshah ïaka Pohskur Phyllong Iingkhaw. Katba haka por 3 baje nohphai sngi ka Heiboriong i pyrshah ïaka Lumphyrnai Sohphoh.
