Ia ka Independence Day Cup football tournament jong ki khynnah U-17, la jop da ka Mynsngat ia ka Lumpyrtuh Mihmyntdu da 2 Kol la 0 ha ka jingialeh footbal final hynne ka sngi ha Madan Kiang Nangbah Stadium Dongmihsngi, Jowai, ha kaba u ma Wailadmiki Shylla uba dei u local MLA uba long ruh u Chairman jong ka MUDA u long u Kongsan.
Ha shwa ban sdang ia ka jingialeh phutbol (football) final la pynlong ia ka jingialang kaba lyngkot ha kaba la ioh ia ka sneng ka kraw, ka kyntu ka kynrong ia ki Nongialehkai football da u ma Wailadmiki Shylla. U ma Shylla haba kren ha kane ka sngi, u la pynpaw ia ka jingkmen ka ba khraw haba u la iohlad ban long u kongsan bad ban sakhi ia kane ka jingialeh football final jong ki samla ba dangkhie dangsan jong ka West Jaintia Hills District.
U ma Wailad ha ka jingkren sneng kren kraw ia ki nongialehkai u la kyntu ia ki nongialehkai jong baroh artylli ki Kynhun (Team) ba kin ialehkai bha bad ba kin pyni ia ki sap ki talent jong ki, ki ban pynsngewtynnat bad pynsngewkmen ia ki nongpeitkai. Ka jingialehkai bha jong ki kam kut tang hapoh ka District, ka Jylla, hynrei hapoh ka ri India bad shabar.
Ka jingialehkai ka long kaba itynnat ha kaba ki nongialehkai na baroh arliang ki sei madan ia ki sap ki talent jong ki, kaba la pynsngewbha bad pynkmen ia ki nongpeitkai. Ha ka kylla step ka jingialehkai ka long kaba thain bha ha kaba ym shym la don ba thep kol ne pynkhihjar. Ha ka kylla miet (Second half) ki nongialehkai ka Mynsngat ki la iakhun tyngeh bad ha ka minit kaba 20 la ioh thep kol da u Bantei Pyrtuh Jyrsi No 6 nangta ha ka minit kaba 25 ka Mynsngat ka la ioh penalty. Ia ka penalty la kynjat da u Ribait Bang bad u nongapkol ka Lumpyrtuh um lah kyrda ia ka bol bad ka la rung beit beit ha kol bad haduh ka bakut ka jingialehkai, ka Mynsngat ka la thep 2 kol la 0 bad ka la long ka Champion team jong ka Independence Day Cup jong ka snem 2025.
Ka team kaba jop (Mynsngat) nalor ka Cup ka la iohrah ruh ia ka song peisa kaba Rs.30,000/- (Laiphew hajar tyngka), katba ka Lumpyrtuh Mihmyntdu nalor ka Cup ka iohrah ia ka song peisa kaba Rs.20,000/- (Arphewhajar tyngka).
