Ka Ummulong SC bad ka The Legend (Lissi Pearl) kila long ki nongjop haka jingïalehkai jong ka District Cricket League 2026 kaba la long mynta ka sngi 16 tarik u Lber 2026, bala pynïaid da ka West Jaiñtia Hills District Cricket Association, ba la pynlong ha ki ar tylli ki jaka.
Ha madan Khliehtyrchi Mini Stadium, ka Ummulong SC kala jop da 40 run ïa ka Mowkaiaw CYC. Ha ka toss, ka Mowkaiaw CYC kala jied ban kawang bol nyngkong.
Ka Ummulong SC kaba tied nyngkong ka la kamai 172 run na ki 35 over bad hap 7 wicket. Na ki nongtied jong ka u ba kamai bun run dei u Wellmanson Passah (C) u ba tied 76 run na ki 51 bol (6 tylli ki 6 run bad 5 tylli ki 4 run), katba u Langmi Bamon ula kamai 40 run na ki 65 bol (4 tylli ki 4 run). Na ki nongkawang bol jong ka Mowkaiaw CYC, u Sandabiang Lathong – 3 wicket na ki 7 over, katba u Eleazer C Dkhar – 2 wicket na ki 7 over
Haba beh ïa ka thong ka Mowkaiaw CYC ka la kamai 132 run na ki 33.1 over bad hap 9 wicket, katba u wei u player ula retired hurt, kumta ka kynhun kala duna 41 run ban poi sha ka thong. Na ki nongtied jong ka, u Sandabiang Lathong ula ïoh 28 run na 28 bol (6 tylli ki 4 run), katba u Eleazer C Dkhar – 22 run na ki 29 bol (2 tylli ki 4 run). Na ki nongkawang bol jong ka Ummulong SC, u M. Nelson Lamare – 2 wicket na ki 7 over, katba u Heimonlang Lyngdoh – 2 maiden over bad 1 wicket.
Ïa ka nam Man of the Match la ïoh da u Wellmanson Passah (C) na ka Ummulong SC.
Ha ka jingïakhun ha madan Wahiajer Mini Stadium, ka The Legend (Lissi Pearl) ka la jop da 7 wicket ïa ka West Jaiñtia Police.
Ka West Jaiñtia Police kaba tied nyngkong hadien ba la jop ïa ka jingkynting pisa, kala kamai 142 run na ki 25 over bad hap baroh ki wicket. Na ki nongtied jong ka, u Loverist Langbang – 31 run na ki 28 bol (2 tylli ki 6 run bad 3 tylli ki 4 run), katba u Bishal M Sangma – 30 run na ki 38 bol (4 tylli ki 4 run). Na ki nongkawang bol jong ka The Legend (Lissi Pearl), u Goldten Sari – 4 wicket na ki 6 over, katba u Rainbow Phawa – 2 wicket na ki 6 over.
Haba beh ïa ka thong, ka The Legend (Lissi Pearl) kala kamai 146 run na ki 23.3 over bad hap tang 3 wicket, bad ka la jop ïa ka jingïalehkai. Na ki nogntiied jong ka, u Rae Sari – 46 run na 46 bol (1 six bad 8 four), katba u Conrad Sana (C) – 32 run na ki 38 bol (1 six bad 3 four). Na ki nongkawang bol jong ka West Jaiñtia Police, u Bishal M. Sangma – 2 wicket na ki 5 over, katba u Kenny Wann – 1 wicket na ki ki 6 over.
Ïa ka nam Man of the Match la ïoh rah da u Goldten Sari na The Legend (Lissi Pearl) uba la leh bha haka kawang bol.
Ki jingïalehkai lashai ka 17 tarik u Lber 2026 kin long kumne ka Khliehtyrchi SC pyrshah ïaka Ummulong B – Khliehtyrchi Mini Stadium, katba ka War Jaiñtia United pyrshah ïa ka Evergreen Mukhla Mission – Wahiajer Mini Stadium haka por 9 baje mynstep.
