Ka War Jaiñtia United bad ka Lion Y&SA kila long ki nongjop mynta ka sngi 10 tarik u Lber ha ki ar tylli ki jingïalehkai jong ka District Cricket League 2026 bala pynïaid daka West Jaiñtia Hills District Cricket Association.
Haba phai haka jingïakhun kaba la pynlong ha Khliehtyrchi Mini Stadium, ka War Jaiñtia United kala pynliem ïa ka Shangpung SC da 62 run. Hadien ba jop ia ka jingkynting toss, ka War Jaiñtia United ka la jied ban tied nyngkong bad kala kamai 146 run bad duh 9 wicket ha ki 35 over. U Manzian Tisni Shylla ula long u nongtied ba kongsan eh da kaba tied 54 run na ki 71 bol, katba u Skhemdiam Suting ula bynrap 19 run. Ha ka liang ki nongkawang bol jong ka Shangpung SC u Rishot I Suchiang, u Bantei Langstang, u Sevenki Chullet bad u Dabiang Law ki la ïoh khur mar 2 wicket.
Haba wan beh ïa ka thong, ka Shangpung S.C kala shah pynhap lut ki wickets tang 84 run ha ki 21.3 over. U Dabiang Law u la long u nongtied ba seisoh tam da kaba tied 27 run. Ha ka bowling, u Skhemdiam Suting bad u Manbha Tariang ki la khur mar 3 wicket na ka bynta ka War Jaiñtia United kaba la pynlong ïa ka kynhun ban jop da kaba suk.
Ïa ka nam Man of the Match la ïoh rah da u Skhemdiam Suting, u nongïalehkai jong ka War Jaiñtia United.
Ha ka jingïakhun kaba la pynlong pat ha Wahiajer Mini Stadium, ka Lion Y&SA ka la jop suk ïa ka Ummulong-B da 8 wicket. Ka Ummulong-B kaba tied nyngkong, hadien bala jop ïa ka jingkynting pisa, ka la kamai 112 run hynrei kala duh lut baroh ki wicket ha ki 24.5 over. U Camlyone Passah ula tied 35 run katba u Johneshwa Passah u la bynrap 29 run. Ha ka bowling jong ka Lion Y&SA, u Deibormi Rngad, u Daymen Shullai, u Noondaystar Pohrmen bad u Wijan Pohleng ki la khur mar 2 wicket.
Haba beh ïa ka thong, ka Lion Y&SA ka la lah ban kynjoh sha ka jingjop tang ha ki 12.3 over da kaba kamai 116 run bad duh tang 2 wicket. U Firstborn Son Dkhar ula tied 52* run bad u Nick Dann u la bynrap 38 run kaba la pynlong ïa ka Lion Y&SA ban jop suk ïa kane ka jingïakhun. Na ki nongkawang bol jong ka Ummulong-B, u L Well bad u Kyndailad Kharbina kila ïoh ban pynhap mar shi wicket.
Ïa ka nam Man of the Match la ïoh rah da u Nick Dann, u nongïalehkai jong ka Lion Y&SA
La pyntip Ki jingïalehkai la shai ka sngi ka 11 tarik kin long hapdeng ka PCC Phramer pyrshah ïa ka Riwar Titan CC ha Khliehtyrchi Mini Stadium bad ka Khimusniang CC pyrshah ïa ka Wahiajer SC ha Wahiajer Mini Stadium ha ka por 9 waje mynstep.
