Ka Young lad’s CC kala jop da 14 runs ïa ka Khliehtryshi SC haka jingïalehkai ba Khathynñiew (17) jong ka District Cricket League 2025 bala pynïaid daka West Jaiñtia Hills District Cricket Association (WJHDCA) mynta ka sngi saitjaiñ 19 tarik ha Mini Stadium, Khliehtyrshi.
Ka jingïalehkai mynta ka sngi hapdeng ka Young lad’s CC pyrshah ïa ka Khliehtryshi SC Ïa ka jingkynting toss la jop da Khliehtryshi SC kaba la kam trai ban kawang ball shwa. Ka Young lad’s CC haba wan ban tied nyngkong kala ïoh lad ban tied tang 135 runs na ki 26.1 overs na ka daw ba wan pynthut u slap bad kala duh 8 wickets. U Heyoomiki Ryngkhlem jong ka Yound Lad’s CC u la lehkai bha uba la ïoh ban tied marwei 37 runs na ki 42 balls.
Na ka daw ka jingpynthut u slap ïa ka target la hap ban pynduna sha ka 69 runs na ki 13 overs. Ka Khliehtryshi SC haba wan ban beh ïa ka thong ka la lah ban tied tang haduh 54 runs na ki 13 overs bad duh 6 wickets, bad kane ka la pynlong ïaka Young Lad’s CC ban jop da 14 runs. U Heyoomiki Ryngkhlem jong ka Yound Lad’s CC u la ïoh ïa ka nam Man of the Match.
Ka jingïalehkai ha ka sngi nyngkong 21/04/2025 kan long hapdeng ka Phramer CC pyrshah ïaka Moodymmai SC naduh ka por 9 baje mynstep.