U ma Wailadmiki Shylla, uba dei ruh u Myntri ki kam Sports ka sorkar Jylla mynta ka sngi, ula leit ban jurip ia ka jingpyntrei ia kawei ka madan ialehkai football ka ba dang pynkhreh ban siang ia u Artitificial turf kaba don ha shnong Mukhla Sohshrieh, West Jaiñtia Hills District.
U ma Wailad ula iathuh ba ia kane ka jaka la ai sngewbha da ka Dorbar Shnong Pyllun jong ka Mukhla, sha ka Sports Department, na ka bynta ban shna ia katei ka jaka ialehkai na ka bynta ki khun samla ka shnong bad ka thaiñ ba marjan.
Ha ka jingleit jurip u Myntri ula lap ba ka jingtrei kala iaid shaphrang, ha kaba la sdang ia ka jingpynmadan ia ki bynta ban siang ia u Artificial turf, ka jingshna ia ki nala bad kiwei kiwei ki bynta.
U ma Wailad ula pynpaw ka jingsngewnguh ia u Myntri Rangbah ka jylla u Conrad K Sangma uba la shimkhia bad buh jingmut ban kyntiew ia ki kam Sports ha baroh kawei ka Jylla da kaba pynioh Artificial turf bad kiwei de ki jingdonkam na ka bynta ki kam ialehkai, khang ba kin lah ban wanrah ka burom ia ka shnong ka thaw ka jylla bad ka ri hi baroh kawei.
U ma Wailad u kyrmen ba kino kino ki project kiba la sdang dei ban pyndep ia ki hapoh ka por ba la buh khang ban long ka jingmyntoi ia ki nongpyndonkam.
