Ka Mawshbuit Boxing Club ka la ioh ban pynhap pyrda noh ia ka invitation boxing competition 2025 kaba la long ha madan Dong Pdeng Mawshbuit ha ka 5 tarik ïaiong 2025.
Ha kane ka sngi ba pynhap pyrda ia kane ka jingialehkai la ia don ryngkat lang da u MLA ka Mawrynkneng u Bah Heaving Stone Kharpran, u MDC , ki nongkitkam jong Meghalaya Boxing Association bad ki nongpyniaid jong ka Mawshbuit Boxing Club bad kumjuh ki club bapher bapher kiba la wan iashim bynta ha kane ka jingialehkai Boxing Competition ha Mawshbuit.
Ki nongwan iashim bynta ha kane ka Boxing Competition ki kynthup ia ka Boxing Association East Khasi Hills, Mawshbuit Boxing Club, ka Green Heart Boxing Club, Upper Shillong Boxing Club bad ka Rising Star Boxing Association.
Ka lahduh ba khur ha kane ka jingialehkai ka long ka Boxing Association East Khasi Hills (BAEKH) kaba la ioh ban khur haduh 25 tylli ki medal, ka Mawshbuit Boxing Club ka la ioh 17 tylli ki medal, ka Green Heart Boxing Club ka la ioh 11 tylli ki medal, ka Rising Star Boxing Association ka la ioh 10 tylli ki medal bad ka Upper Shillong Boxing Association 9 tylli ki medal.
Haba ai jingkren ha kane ka sngi na ka liang U MLA u ai khublei ia ka Meghalaya Boxing Association, ka Mawshbuit Boxing Club kiba la pynlong ia kane ka jingialehkai ka long kaba don jingmut bad kaba ïarap shibun ia ki khun samla kiba don ka sap ka phong ha kane ka jingialehkai Boxing. U la ong ha ki por mynshwa kim ju don ki khynnah kiba wan shakhmat khamtam ki kynthei ban lehkai Boxing, hynrei mynta ki khynnah kynthei bad ki shynrang ki la wan shakhmat ban ialehkai Boxing, ha ki por mynshwa ki bun kiba sheptieng hynrei ha ki por mynta pat kim sheptieng ki pyni shisha ia ki sap bad ki long kiba tbit ban ialehkai bad kiwei pat.
U ai jingiaroh ia ki nongpyniaid kiba la pyniaid bha ia kane ka jingialehkai namar kane ka jingialehkai ka wanrah ia ka jingieid jingiajan para briew. U ai ka jingkitbok ia ki nongpyniaid jong kane ka jingialehkai Boxing ban kyntiew shuh shuh ia ki khun samla ha ka jingialehkai Boxing bad ngeit skhem ha kawei ka sngi kin sa mih ki Mary Kom na ka Jylla jong ngi bad u ngeit skhem ba ka Meghalaya Boxing Association kan dang iai kyntiew ia ka kane ka sports hapoh ka Jylla.
