Ka kynhun ïalehkai jong ka Maia Club Umjalasiaw kala long ka kynhun lahduh haka kyrdan ‘Joybell Suiam Memorial Trophy 2nd Division Football League 2025’ ïa kaba la pynïaid da ka Thadlaskeiñ Sports Association (TSA) West Jaiñtia Hills kaba la long mynta ka sngi Balang 15 tarik u Risaw ha madan Wahiajer Multi-Sports Complex.
Haba phai sha ka jingïakhun phainal ka Maia Club Umjalasiaw kala lah ban pynliem da 3-1 kol ïaka Bamkamar SC, ïa ki kol na ka Maia Club Umjalasiaw la thep da u Gabriel Siangshai ha ka minit ba 10 bad u Leimiki Siangshai uba la ïoh ban thep ar kol haka minit ba 61 & 70. Katba na ka liang ka Bamkamar SC kala pyrshang ban ïakhun katba lah hynrei kala ïoh ban pynphai tang kawei ka kol lyngba u Dlansing Mylliem haka minit ba 36.
Ïa ka nam Best Player la ïoh da u Leimiki Dkhar, Top Scorer da u Leimiki Dkhar, Best Goal Keeper da u Dame Dkhar baroh lai ngut kiba dei na ka kynhun jong ka Maia Club Umjalasiaw.
Naka liang u ma Jesse Suiam uba dei u EM ka JHADC ula long kum u kongsan, ha ka jingdonlang u ma Kmenlang Shylla u President ka TSA, u ma Mutshwa Thabah u Vice President ka TSA kiba la ai ruh ka jingkren ha kane ka sngi pynkut ïaka 2nd Division Football League. Nalor kiwei de kiba la wan ban sakhi lang ki long u ma Andriew Sari (Secretary Shnong Wahiajer), u ma Ebormi Lyngdoh (General Secretary TSA), ma Pyrkhat Lamare (Treasurer TSA).
Ka kynhun kaba ïoh rah ïa ka nam lahduh ha kane ka lympung kala ïoh rong 40 hajar tyngka bad ka kynhun kaba wan ba ar kala ïoh rong 20 hajar tyngka. Baroh kine ki ar kynhun kiba poi sha ka phainal kila ïoh ban rung sha ka 1st Division haka aiom lehkai ka ban wan.
