U bah Deven Lyngdoh ba shong ba sah ha Mawkyrwat mynta ka sngi ka 25 tarik Naitung 2025 u la wan shakhmat ban pynpaw sha ki lad pathai khubor ha kaba iadei bad ka jingbym shah jied bad khlem mih kyrteng ha ka Trial ha ka jingialehkai Cricket.
U la iathuh ba ka jingbym shah jied ha ka Trial ka dei ba ki nongjied ki peit ia ka economy bad na ka liang jong u Deven Lyngoh u la pyntip ba u la pynkhreh bha bad khlem mih ka kyrteng ha kane ka trial.
Shuh shuh u la ong ba ha ki jingialehkai u ioh lad ar sien bad shisien u khlem lah ban ialehkai bha bad ha ka sien ba ar u ialehkai bha bad u khlem shah jied bad shah jied pynban da kiwei ki player. U la kyrpad ia ki nongpyniaid jong ka Meghalaya Cricket Association (MCA) ba kan pynlong biang ia ka Selection Trial ban jied hok ia ka sap kaba ki Khasi ki don bad thrang ban lehkai ha kane ka jingialehkai.
Haba iadei bad ka jingialehkai cricket ha ka jylla u la pynpaw ba shibun ka sap ki don kum ki player bad kim ioh ban ialehkai namar kim ioh ban rung ha ka Senior team Meghalaya Cricket Association,
U la kyrpad jur ia ka Meghalaya Cricket Association ba kan jied hok ia ki player donsap namar ka jied tang ia ki player ki bym dei ki Khasi bad ka pynlong ia ki trai jylla ba kin duh mynsiem noh bad ka MCA kam dei ban ailad tang ia kiwei ki jaitbynriew, hynrei ka dei ban ailad lang ia ki Khasi kiba don sap ban lehkai cricket ban ioh jingkyrmen ban lehkai bha ha kane ka jingialehkai.
U la bynrap ka Meghalaya Cricket Association ka jied tang ia ki player ki bym dei ki Khasi bad ki jied da ki player na bar jylla kum na Uttar Pradesh, Bihar bad na kiwei ki jylla bad ki pynbiang ia ki kot ki sla sha ka Meghalaya Cricket Association bad kane ka pyni ia ka jingleh politiks bad ha ka sports ban pynrung ia ka politiks te ngim sngewtynnad la pynpaw u Deven lyngdoh.
Khatduh u la ong kum u player ka lad ka dang don hynrei sa tang katno eh namar ka por ban ialehkai ruh ka la jan kut bad u pyrkhat na ka bynta ki lawei ki ban dang wan ba kin ioh ban lehkai bad ym donkam pisa ban lehkai hynrei dei ban ialehkai da ka sap kaba ki don.
Khatduh u la kyrpad ia ki sengbhalang ban shimkhia ia kane ka bynta ban iohlad ki samla Khasi kiba don sap ha kane ka jingialehkai cricket bad katno kan long kaba sngewtynnad lada ki Khasi ki ialehkai bad mihkhmat ban long kum kita ki khlur ialehkai bad lada ki leh sniew iaid beit shakhmat bad pyni ia ka sap ba don kum ki Nongialehkai.
