Ka Amlarem Sub-Divisional Sports Association (ASSA) shen kan pynlong ïaka lynpung ïalehkai phutbol haka kyrdan Under-13 bad Under-15 jong ki khynnah shynrang bad kynthei ka ban long ha kane ka taiew ba nyngkong lane ba ar jong u bnai Jylliew (June), 2025 ha madan phutbol ka Jarain namar ïa ka Madan Mini Stadium ka ASSA ha Ladjaplem ka dang don mynta hapdeng jingpyntrei ïa u phlang Artificial Turf.
Shuh shuh ïa kane ka Tournament yn tip ïaka kum ka ‘Under- 13 & 15 (boys & girls) Independence Day Cup 2025’, ha rynkat ka jingïatreilang bad ka ophis jong ka SDO Civil Amlarem, West Jaiñtia Hills District bad ïa kane ka lympung la khmih lynti ban pyndep haka 15 tarik August, 2025 kaba dei ka sngi ïoh laitluid ka Ri India.
Na ka bynta ka jingjurip (Screening) ïa ki player kan long haka 24 tarik May 2025 ha ophis SDO Civil Amlarem naduh ka por 9 shiteng mynstep, ki player kin hap ban wanrah lang ïaki kot donkam kum ka Aadhaar card/Birth certificate. La pyntip haka kyrdan U-13 kin dei kiba kha hadien u snem 2013, katba haka U-15 ki dei kiba kha hadien u snem 2011.
Kino kino ki kynhun ne ki Club kiba kwah ban wan ïashim bynta ha kane ka lympung kin sngewbha phone ha une No- 6009446593.