Ka Lion Sports and Youth Affairs ha ka 21/06/25 ka la pynkut ia ka 6 Aside Knockout Football Tournament 2025, ia kaba la pynlong ha Madan Biar Skur, Mission Compound, Jowai.
Ka jingiakhun Final ha katei ka sngi ka la long hapdeng ka Khailung FC pyrshah ia ka Resilience, ha kaba la wan ban sakhi lang da u nongialehkai ba paw jong ka India bad uba dei ruh u Ex-MLA jong ka Mawphlang Constituency u bah Eugeneson Lyngdoh uba la long u kongsan ha kane ka sngi.
La wan ban iadon ryngkat ruh da u MDC ka thaiñ u ma A. Andrew Shullai, u Waheh Shnong, ki dkhot ka Dorbar Shnong bad kiwei de kiba la shah khot sngewbha ha ryngkat ka jingsakhi jong ki riew ieit phutbol jong ka nongbah Jowai.
Ia ka nam lahduh (Champion) jong kane ka lympung ka leit sha ka Khailung FC ha kaba kala lah ban pynliem ia ka Resilience da 1-0 kol. Ia kane ka shikol la ioh ban thep da u Richard Dhar. Ia ka nam Man of the Match la ioh rah da u Richard Dhar hi jong ka Khailung FC.
Ka kynhun Khailung FC kala ioh ban rah ia ka song pisa kaba Rs.30,000/- (Laiphew hajar) tyngka katba ka Resilience kala ioh ia ka song pisa kaba Rs.10,000/- (Shiphew hajar) tyngka ryngkat bad ki trophi.
