Ka jingiakop kynjat bol kyrpang na ka bynta ki khynnah ba hapoh 13 snem ka rta ba la tip kum ka 1st Chilliangraij Under 13 Football League ka la sdang hynnin ka 2 tarik February hapdeng ka jingwan sakhilang u Samehi Laloo, President NPYF, Jowai Block kum u kongsan ryngkat ka jingiadonlang u D.H.Pde, Waheh Chnong Chilliangraij, u Oriland Shylla, General Secretary Chilliangraij nalor kiwei ki riew rangbah.
Ia kane ka jingiakop la peit bad pyniaid da ka Chilliangraij Sports & Youth Affairs Committee ha kaba la don haduh 24 tylli ki team ba la wan ban iashimbynta bad ka song pisa ba la mang na ka bynta ka lahduh jong kane ka iakop ka long 10 hajar tyngka bad 5 hajar tyngka ia kaba sharem.
U Samehi Laloo, President NPYF, Jowai Block haba kren kum u kongsan u la iaroh ia ka Chilliangraij Sports & Youth Affairs Committee kaba la shimkhia ban pynlong ki Tournament bapher na ki por sha ki por ha ka thong ban kyntiew ia ka jingialehkai Football hapoh ka dong ka thaiñ.
Ki ar tylli ki team kiba lamih madan ban iatynjuh bor ha kane ka sngi ki long ka Dream Chaser pyrshah ia ka Salaroh bad ia ka nam jop ha kane ka sngi larah da ka Dream Chaser da kaba pynrem ia ka Salaroh da 6 kol.
Ha ka kylla step jong ka jingialehkai ka Dream Chaser ka laioh ban thep lai kol lyngba ka bol ba la kynjat da u Jewell Lyngdoh, u Wamon Phawa bad u Replace Rymbai katba ha ka kyllamiet pat ka Dream Chaser ka laioh biang sa 3 kol lyngba ka bol ba la kynjat da u Perfect Lyngdoh, u Wamon Phawa bad u Kune Lyngdoh.
