Ka East Jaintia Hills District mynta ka sngi ka 30 tarik Iaiong, 2025 ka la sdang ia ka District Level Inter School Athletics Meet 2025 ia kaba la pynlong da ka Ophis jong u District Sports Officer, East Jaiñtia Hills District ha ryngkat ka jingïatreilang bad ka East Jaiñtia Hills District Sports Association (EJHDSA) ha madan ïalehkai Teilang kaba don ha shnong Dkhiah West.
Ha kane ka sngi la don lang u Additional Deputy Commissioner ka East Jaintia Hills District u S.R Marak, u Additional Superintendent of Police ka East Jaintia Hills District u S. Paslein, ryngkat ka District Sports Officer ka East Jaintia Hills District ka kong Stephanie M Rapsang ka District Public Relations Officer ka East Jaiñtia Hills District, u E.S War, ki nongpynïaid skul, ki nongkitkam jong ki Sports Association bapher bapher kiba hap hapoh ka East Jaiñtia Hills District, ki samla pule bad kiwei kiwei.
Ka District Level Inter School Athletic Meet mynta u snem ka la don ïa ka jingïashim bynta jong ki 23 (Arphew lai) tylli ki skul jong ka East Jaiñtia Hills District ha kaba palat 600 (Hynriew spah) ngut ki nongïalehkai ki la wan ban ïakhun ha ki 42 tylli ki jingïalehkai ban pynlong ha kine ki lai sngi ban wan.
Ha kane ka jingplie ïa kane ka jingïalehkai, baroh ki nongrah lama iong bad ki nongïalehkai, ba la ïalam da u nongïalehkai ba pawnam ka East Jaiñtia Hills District, u Rishanmeki Ryngkhlem, ki la shim ïa ka jingkular ban pynneh pynsah ïa ka mynsiem ïalehkai bad ïalehkai hok. Ha ka sngi ba nyngkong jong kane ka jingïalang la pyni ïa ka jingïashim bynta ba sngewtynnad jong ki samla pule kiba la ïashim bynta ha ki jingïalehkai bapher bapher kynthup ïa ki khynnah shynrang hapoh 16 snem bad ki khynnah kynthei hapoh 18 snem.
Ha ka Shot Put jong ki khynnah Under-16 Years Boys, u Nightiful Sukhlain jong ka Khliehriat Presbyterian Secondary School u la ioh ia ka takma ksiar, u Arwinki Rymbai jong ka Wapung Higher Secondary School u la ioh ia ka takma rupa katba ka Mutskhem Sari na ka Sein Jait Tuber Higher Secondary School ka la ioh ia ka takma rnong.
Ha ka kyrdan Under-18 u Vincent Chyrmang na Wapung Higher Secondary School u la khur ia ka takma ksiar bud sa u Ram Lyngdoh na ka SeinJait Tuber Higher Secondary School bad u Edyson Dkhar na ka Sham Sham Secondary School kiba la khur ia ka takma rupa bad takma rnong.
Ha ka jingïakob High Jump jong ki khynnah Under-18 Years Boys Category, u Kynsai Rymbai jong ka K.B.Memorial Secondary School u la khur ïa ka takma ksiar, u Heimonmi Dkhar na San Shnong Secondary School bad u Daoshwa Dkhar na Wapung Higher Secondary School ki la khur ïa ka takma rupa bad rnong.
Ha ka jingïakob Long Jump jong ki khynnah kynthei kiba hapoh 18 snem ka rta, ka Fancy Meliorate Siangshai na ka K.B Memorial Secondary School ka la ïoh ban khur ïa ka takma ksiar, katba ka Olivia Bareh na ka Ambrose Memorial Secondary School bad ka Juh Phawa na ka Sein Raij Branch (Jalyah) ki la khur biang ïa ka takma rupa bad rnong.
Ha ka jingïakob Javelin Throw jong ki khynnah kynthei kiba hapoh 18 snem, ka Eunikilalthangthari Ngamlai na Khliehriat Presbyterian Higher Secondary School ka la ïoh ban khur ïa ka takma ksiar katba ka Sathi Phawa na San Shnong Secondary School bad ka Tholinda Swer na Rymbai Government Secondary School ki la ïoh ban khur ïa ka takma Rupa bad Rnong.