Ka Amlarem Social Club kala long ka lahduh haka lympung ïalehkai phutbol bala tip kum ka ‘First Warjaiñtia Invitation Football Tournament 2025’ ha ka jingïakhun phainal kaba la long ha kane ka sngi saitjaiñ 17 tarik u Jymmang, 2025 ha madan phutbol ka Amsohkrut Amshipai, Amlarem Civil Sub-Division.
Ha kane ka jingïalehkai Final hapdeng ka Amlarem Social Club, Amlarem bad ka Syndai Pyllun Sports Club, Syndai kaba la long kaba itynnad bha. Ha kaba ka Amlarem Social Club kala ïoh ban pynliem ïa ka Syndai Pyllun Sports Club da 4-0 kol. Ha ka kylla step ka Amlarem Social Club kala ïoh ban pynkhih jar da u Tip Rasmut Jersey No.11 haka minit kaba 20, haka minutes kaba 40 kala ïoh ban thep biang da u Phrangki Buam Jersey No.10.
Katba ha ka kylla miet kala ïoh ban pynkhih jar da u Phrangki Buam bad haka minit kaba 87 la ïoh ban thep kol da u Pdiang Suting jong ka Amlarem Social Club. Na ka liang ka Syndai Pyllun kala ïaksaid ban ïaleh tyngeh hynrei ki rang ïalehkai ka Amlarem Social Club kim ai lad haduh kut ka jingïalehkai.
Da kane ka Amlarem Social Club kala jop da 4-0 kol bad lyngba kane ka Amlarem Social Club kala rah syndon ïa ka nam lahduh Champion mynta u snem. Katba ïa ka nam Disciplinary Team la ïoh rah da ka Padu United, ka nam Best player la ïoh rah da u Refill Syndai, Top scorer la ïoh da u Tip Rasmut bad ka nam Best Goalkeeper la ïoh rah da u Kitbok Buam.
Ha kane ka sngi pynkut la don ka jingïalang bala pynïaid da u Vice President ka seng Samla Heartcasing Dkhar, ka ïoh ka jingkren na u General Secretary ka seng Samla Everest R Langstang, u la pynpaw ïa ka jingshem jingeh ha kiba bun ki liang ha ka por ba sdang ïa kane ka Tournament hapoh ka Warjaiñtia hynrei kim shem duh jingkyrmen namar ba ki don ka jingpyrkhat ïa kaba bha ka ban ïalam lynti shakhmat. U Kyrmen skhem ki shnong hapoh ka thaiñ Warjaiñtia baroh kawei kin ai ka kti ka diang ka kti ka mon ban bteng biang ïa kane ka lympung hapoh Warjaiñtia na ka bynta ka 2nd Warjaiñtia Invitation Football Tournament 2026 ha u snem ban wan. Ula pynpaw ka jingsngewnguh ïa ka trai madan kong Bataw na ka Shnong Thangbuli bad ïa ka shnong Amshipai baroh kawei kiba pdiang ïa ka seng ban sdang ïa kane ka Tournament.
Na ka liang u kongsan u ma Lahkmen Rymbui u MLA ka thaiñ ula pyrto ïa ka jingtrei shitom ki nongïalam bad ki dkhot ka WJSU bad ai khublei ïa u paid ba wan pynshngaiñ ïa kane ka final match ka First Warjaiñtia Invitation Football Tournament 2025. U kyntu ïa ka seng ba kin trei shitom shuh shuh ban ïoh ïa ka jingkyrshan na ki paid ka thaiñ ka Warjaiñtia baroh kawei bad ka Bri Hynñiewtrep.
Kiwei de kiba ai jingkren ki kynthup ïa u symbud kongsan u Aibor Khongjee, bah BS Hayong, Bah Alban K Gashnga, Chief Advicer ka seng, nalor kiwei de kiba la shah khot sngewbha, ha ryngkat ka jingwan sakhi lang jong ki paidbah ka thaiñ bad nabar kumjuh.
