Ka jingiakhun na ka bynta ban iaknieh jaka ban ioh rung sha ka Semi final jong ka Lympung Super Cup 2025 hapdeng ka Mawlai SC pyrshah ia ka Sawmer SC ka la long ka jingiakhun ba itynnad bad kaba la pynshit ia ki paidbah hynne ka janmiet ha ka jingiakhun ba la pynlong ha madan SSA Stadium, Polo Shillong.
Ka jingiakhun ka la kut noh da ka jingiakhaid, bad ia ki kol na ka bynta ka Sawmer la ioh ban thep da u Bickyson Kharkongor ha ka minit ba 10, Banraplang Pyngrope ha ka minit ba 53, katba na ka bynta ka Mawlai la ioh ban thep da u Robert Khongriah ha ka minit ba 20,u Diogo Khyriem ha ka minit 90+2.
Hadien katei ka jingiakhaid kol, u Rephri u la hap ban pyniakhun da ka penalty. Lyngba katei ka jingioh kabu, ka Mawlai ka la khur ia ka jingjop ha kaba baroh 5 ngut ki la ioh ban pynkhih jar katba na ka bynta ka Sawmer uwei na ki 5 ngut u khlem lah ban thep kol.
Ia ka khusnam ‘Player of the match’ la ioh ban khur da u Banraplang Pyngrope ia kaba la wan ban sam da u MLA ka Mawkynrew Constituency Bah Banteidor Lyngdoh.
