Ka tnat Sports and Youth Affairs jong ka Sorkar Jylla ha ka 22 tarik Lber 2025 ka la ai jingkitbok kitrwiang ïa ki rang ïalehkai ka Myngken Christian Higher Secondary school, Bhoirymbong ha Hotel Centre Point, Shillong, kum shi bynta ba kin mihkhmat ia ka Jylla sha ka jingialehkai Indo – Frence Football Tournament ka ban long ha Paris naduh ka 24 tarik haduh 30 tarik Lber 2025.
Ha kane ka sngi la wan ban long kongsan da u President ka Meghalaya Football Association (MFA), u bah Hamletson Dohling, ha ryngkat ka jingïadonlang u D.D Shira, Director ka Sports and Youth Affairs, u Trai ka Centre Point Hotel, u bah Larsing Sawïan, uba dei ruh u Chairman ka Shillong Lajong FC nalor kiwei kiwei.
Na ka liang ka MFA ka la ai jingïarap sngewbha da ka song pisa sha kine ki samla Ïalehkai jong ka Mynken Christian Higher Secondary School.
Na ka liang u President jong ka MFA haba ai jingkren u la ong ka long ka jingkmen ia ka Jaitbynriew bad kumjuh ia ka Jylla ba ki khynnah skul ka Mynken Christian ki ioh kane ka lad ban shim bynta ha kane ka jingialehkai shabar Ri, bad u kyntu ba kin long kiba don akor don burom haba ki mihkhmat ia ka Jylla sha jingialehkai bar ri bad u kyrkhu kyrdoh ia ka skul Mynken Christian ban ialehkai bha ban wanrah jingjop ia ka Jylla bad kumjuh ia ka Jaitbynriew.
Shuh shuh u la ong na ka liang ka Meghalaya Football Association ka jied ki player kiba tbit ban mihkhmat ia ka Jylla ha ryngkat ka jingkyrshan na ka sorkar bad u la ong ka Meghalaya Football Association kan sa don ruh da ka jaka ai jinghikai ne ka academy khnang ba ha ka lawei ngin ioh ki player kynsai kiba tbit.
Shwa ban pynkut u ai ka jingkitbok ia ki khynnah ka Mynken Christian Higher Secondary School ba kin ialehkai bha bad u la ong kyntu ia ki khynnah ka Mynken ba kin wanphai sha ka Jylla ha ryngkat ka jingjop bad ka Trophy.