Ki player ka Demthring SC kila mih madan mynta ka sngi 15 tarik da kaba shu ïeng beit ha madan khlem da ïakhuh pyshah bad ki player jong ka Ladthadlaboh SC haka jingïakhun Semi Final ba khadduh ban ïoh rung sha ka Final jong ka lympung ‘Super Division Football Tournament– 2025’ bala pynïaid daka West Jaiñtia District Sports Association, (WJDSA).
Kane ka jingleh jong ka Demthring SC ban nym ïakhun pyrshah ka long naka daw ka jingshah Suspend ki player ka Demthring bad ki Official jong ka, hadien ka jingshah rem haka Khimusniang SC da 2-1 kol haka jingïakhun Semi Final- 1 Qualifier haka 5 tarik u Nohprah da kaba kynnoh ba ka dei na ka jingshah shilliang u Referee kaba la pynmih ka jingïaklumar ha madan.
Mynta la sngi na ka liang ki nongkyrshan jong ka Demthring SC ruh kila wan sha madan ka Kiang Nangbah Stadium, Dongmihsngi Jowai ha ryngkat ki lama ïong ban pyrshah ïa ka WJDSA kaba la suspend ïa ki player jong ka.
Ha ka jingïakhun mynta ka sngi la rai jop ïa ka Ladthadlaboh SC da kaba ïoh thep haduh 9 kol bad bun na ka por ïakhuh ki player jong ka Ladthadlaboh SC kila shu lehkai para maki da kaba ïa pass kylling ïa ka bol haduh ba kut jong ka por.
