-Khyrwit Hat-Trick u Loving Suting-
Ka Mawlai Sport Club ka la ioh ia ka kabu ban knieh ia ka kyrdan ba nyngkong na ka Nangkiew Irat SC hadien ka jinglah ban pynliem noh ia ka Mylliem SC da 4-0 kol ha ka jingiakhun na ka bynta ka Lympung Shillong Premier League (SPL) ba la pynlong ha Madan Shillong Sports Association Polo, Shillong.
Ka Mawlai kaba dei ka lahduh jong kane ka lympung ha u snem 2023-24 ka don jingkyrmen shibun mynta ka samoi ban iaineh ha ka kyrdan ba nyngkong bad knieh ruh ia ka nam laduh na ka Shillong Lajong (Champion 2024-25), kata hadien ba la bishar katkum ka buit ialehkai mynta ka samoi.
Ka jingjop ha kane ka sngi ka dei ruh lyngba ka jingialehkai bha jong u Loving Suting ha kaba u la thep 3 kol kata ha ka minit ba 16, 40 bad 49 katba ia ka shikol la ioh ban thep da u Fairming Suting ha ka minit ba 18.
Ka Mawlai ka la ioh ban khur 12 poin na 5 sien ki jingiakhun katba ka Mylliem ka dang neh 5 poin na 5 sien ki jingiakhun mynta ka samoi.
Ka Mylliem kan bteng biang ia ka jingiakhun na ka bynta kane ka lympung pyrshah ia ka Sawmer SC ha ka 26.9.2025 katba ka Mawlai kan iakhun pyrshah ia ka Shillong Lajong ha ka 1.10.2025.
