U MDC ka 2-War Central u ma Jamshaphrang Pohtam ula wan ban plie pyrda ïa ka ‘1st Warjaiñtia Invitation Football Tournament 2025’ ha kane ka sngi saitjaiñ 12 tarik u Ïaïong, kaba la pynïaid da ka Sports and Youth Sub Committee jong ka seng War Jaiñtia Students’ Union (WJSU).
Ïa kane ka lynpung ïalehkai phutbol la pynlong ha madan ïalehkai ha Amshipai (Amsohkrut) Amlarem Civil Sub-Division, kila don haduh 8 tylli ki kynhun kiba la wan ban ïashim bynta kynthup na ka thaiñ War Jaiñtia, na Laskeiñ, na Thadlaskeiñ, na Saipung bad na Pynursla East Khasi Hills.
Ha kane ka sngi nalor u kongsan la wan ban donlang da ka symbud kongsan ka kong Deiwipaya T. Tongper (MDC) Narpuh, u Dolloi ka Elaka Satpator u Daman Lakashiang, ki nongïalam ka WJSU, ki riewrangbah ka thaiñ bad ki paidbha kiba la wan shakhi ïa kane ka sngi, katba ïa ka jingïalang la pynïaid da u Joint Organising Secretary WjSU CB Amlarem ma Youmiki Syrti.
Haba ai jingkren u kongsan ma Pohtam ula ai khublei kyrpang ïa ka War Jaiñtia Students’ Union kaba la shim ïa kane ka bynta ban kyntiew ïa ka kam ïalehkai phutbol hapoh ka thaiñ War Jaiñtia kaba la don haduh 90 percent ki rangïalehkai phutbol. U ai ka jingkitbok kitrwai ba ïa baroh ki kynhun kiba la wan ïashim bynta ba kin ïakhun met bad mynsiem ban ïoh rah ïa ka nam lahduh.
Ha ka sngi sdang jong ka jingïakhun kaba la long hapdeng Iatyllilang lumsehkot Cultural Sports Club Raliang ka lahduh ka Laskeiñ region pyrshah ïaka Amlarem Social Club ka lahduh ka Super Division Amlarem Sub-division. Ha kaba ka Amlarem Social Club kala jop da ka jingïashut Tie-Breaker da 4-2 kol.
La pyntip ba ka jingïakhun kaba bud kan long haka 19 tarik u Ïaïong, 2025 ka Lamyrsiang SCC ka lahduh ka Saipung region West Jaiñtia Hills kan ïakhun pynshah ïa ka Lamin Eleven SCC ka lahduh jong ka 1st Division Amlarem Sub Division ha ka por 2:00 pm.
Ka jingthmu jong ka seng ban pynlong ïa kane ka lympung ïalehkai phutbol ka long shi bynta ban pynpaw pyrthei ïa ki sap ki phong jong ki rangïalehkai phubol ka thaiñ War Jaiñtia bad ïa ka jylla hi baroh kawei.
