U ma Wailadmiki Shylla, uba dei ruh u myntri ka tnat jong ka Health & Family Welfare, Sports and Youth Affairs, mynta ka sngi jong ka 19 tarik Kyllalyngkot u la plie pyrda iaka jingialehkai Basketball Tournament 2026, kaba la pynlong da ka Seng Samla CMC Iawmusiang –Khimusniang, haka jingiatreilang bad ka SYM. Ia kane ka lympung ialehkai Basketball la pynlong kum shi bynta ban kynmaw burom ia ka (L) Lily Mary Laloo. Ia kane ka jingialehkai la pynlong ha Joseph Nardiny Seminary Ummulong.
U ma Wailad haba ai jingkren ha kane ka sngi u la iaroh u ia ka seng Samla CMC Iawmusiang–Khimusniang, kaba la lah ban pynlong ia kum kane ka jingialehkai kaba ai jingmyntoi shibun ia ki samla ha ka liang ka sport.
Na ka liang jong u ma Wailad u la kitbok kitrwiang iabaroh ki nongkit kam ka seng bad kumjuh ruh ia ki kynhun bad ki player ba wan ban ia shim bynta ha kane ka lympung.
Shuh shuh u la kyntu kynpham ia ki player ban kin practice bha nangne sha khmat, namar ba ha u snem 2027 yn don ka National Games, ka ban long ka kabu ksiar ia ki players ban ioh iashim bynta ha kane ka National Games. Ha kane ka sngi u ma Wailad u la noh synniang ruh haduh shi lak tyngka sha ka seng.
U Rudolf Laloo, u ba dei u khun rangbah jong ka kong (L) Lily Mary Laloo, haba ai jingkren u la ong, kane ka lympung ialehkai basketball kam dei tang shaphang ka jingïalehkai, hynrei ka dei shaphang ka jingieit, ka jingkynmaw burom bad ka jingïatylli. Ngi pynlong ïa kane ka lympung ialehkai da ka jingsngew sarong ha ka jingkynmaw burom bad ka jingieit ïa ka kmie jong ngi kaba la khlad noh, ka Lt. Lily Mary Laloo, kaba la long ka briew kaba ïaineh, kaba ai jingïasyllok bad kaba ai mynsiem ïa ngi man la ka sngi.
Ha kane ka sngi la donlang ruh u District Sports Officer (DSO) West Jaiñtia Hills District ma Khroobok Passah, Fr. Anthony Kharkongor (SYM), uba la synniang ruh 50 hajar tyngka sha ka seng Samla, ladon lang u Most. Rev. Ferdinand Dkhar Bishop ka Jowai diocese, kiba ha iing ha sem ka kong (L) Lily Mary Laloo naduh u khun rangbah jong ka u Rudolf Laloo, Fr. Lambert Dkhar, Rector Joseph Nardiny Seminary Ummulong, Fr. Lawrence R Paswet DYD, ki nongkitkam ka seng Samla Parish, ki nongkitkam ka Parish Pastoral Council Jowai bad kiwei de ki riew rangbah ba la donlang ha kane ka sngi.
Ka jingialehkai mynta ka sngi sdang jong kane ka lympung ka la long hapdeng ka JNR B bad ka Wizard, ha kaba ka Wizard ka la jop da 51 baskets ia ka JNR B kaba la ioh tang 39 baskets.
Ha kane ka lympung la wan ban iashim bynta 9 tylli ki kynhun, kiba kynthup 5 tylli na Shillong bad 4 tylli na Jowai.
