-ïoh biang ka Rangdajied bad Shillong Lajong ban ïashim bynta-
Ka President jong ka Ri India, ka Droupadi Murmu ka la pyllait bad kaweh lama ïa ki Trophy jong ka lympung ialehkai Durand Cup 2025 ha ka jingïalang kaba la long ha Rashtrapati Bhavan Cultural Centre mynta ka sngi (4 tarik Naitung, 2025).
Ka klob kaba na kane ka Jylla, ka Rangdajied United FC bad Shillong Lajong FC kin ioh biang ban iashim bynta ha ka lympung Durand Cup ba 134 kaba dei ruh ka Lympung Phutbol ba la rim tam ha ka Dewbah Asia.
Ha ka jingkren lyngkot ha kane ka sngi, ka President ka la ong ba ki jingialehkai ki kyntiew ia ka jingim kaba iaid beit iaid ryntih, ka jingkut jingmut bad ka mynsiem iatreilang. Ki jingialehkai ki don ka bor kaba kyrpang ban pyniasoh ia ki briew, ki thaiñ bad ki ri. Ha India, ka la long ka atiar kaba khlaiñ bha na ka bynta ka jingpyniasoh ha ka ri. Baroh ki para nongshong shnong ki sngewkmen haba ka lama jong ka ri ka her ha ki Olympics ne ha kano kano ka lympung ialehkai kylleng ka pyrthei.
Ka President ka la ong ba ka phutbol ka don ka jaka kaba kyrpang ha ki mynsiem jong ki million ngut. Kam dei tang ka jingialehkai; kadei ka jingthrang. Ka jingialehkai phutbol kadei shaphang ka buit, ka jingiaishah bad ka jingiatreilang na ka bynta kawei ka thong. Ki jingïalehkai kum ka Durand Cup ym tangba ka kyntiew ïa ka mynsiem ïalehkai hynrei ki ïarap ruh ban kyntiew ïa ka pateng ban wan jong ki nongïalehkai phutbol, kaba ai ka rynsan ïa ki ban kiew. Ka la iaroh ia ka bynta jong ki shipai ban pynim bad kyntiew ia ka nongrim jong ka Durand Cup.
Ia kane ka lympung yn sdang ha ka 23 tarik mynta u bnai bad yn pynkut ha ka 23 Nailar 2025 ha kaba ka Rangdajied bad Lajong kin ioh kabu ban ialehkai ha la iing, kata ha madan Jawaharlal Nehru Stadium, Polo Shillong. Katba ka North East United kaba la pdiang katto katne ki jingialehkai (ha ka samoi ba lah dep) ha Shillong kum ka Home Game lane ka jingialehkai ha la ïing kan hap ban ialehkai mynta ka samoi ha Guwahati, Assam.
