Ka 14 tarik Lber 2025 ka dei ka sngi ka ban sah kynmaw na ka bynta ki nongialehkai bad ki tnad ïalehkai bapher bapher kiba hap ha ka thaiñ South West Khasi Hills District (SWKHD) ha kaba u MLA jong ka Mawkyrwat Constituency, Bah Renikton Lyngdoh Tongkhar u la pynithuh paidbah ia ka seng treikam ha ka kam ïalehkai ia kaba la tip kum ka South West Khasi Hills District Sports Association (SWKHDSA).
Kane ka Association kan khmih ia baroh ki kam ïalehkai ha ka distrik bad kan iarap ruh ban kyntiew ia ki sap jong ki Samla bad ruh ban shimkhia ha baroh ki jait jingialehkai.
Ha kane ka jingialang, la don ryngkat da u Bah H.S.Diengdoh – President, Bah Y.G.Lyngdoh – Working President, Bah Forwardmen Nongrem – General Secretary, bad u Bah Daman Syngkon – DSO South West Khasi Hills District. Ha kajuh ka por, la ioh ruh ban pyllait paidbah ia ka kot kaba batai ia ka jingtreikam jong ka SWKHDSA.
Kum ban shu pynkynmaw, kane ka distrik ka la ioh ban khur 7 tylli ki takma ksiar ha ka lympung 6th Meghalaya Games bad ioh ruh ia ka kyrdan ba 8 napdeng 12 tylli ki distrik kiba la ïashim bynta ha katei ka lympung ba la pynlong ha u bnai Kyllalyngkot 2025.
Haba ai jingkren ha kane ka sngi, na ka liang u MLA ka thaiñ u la sdang nyngkong da kaba ai jingiaroh ia ka Association kaba la shim ia kane ka synjam ka ban ai mynsiem ia ki samla kiba ieit ia ki jait jingialehkai bapher bapher. U la ïaroh ruh ia baroh 90 ngut ki nongïalehkai kiba la ïashim bynta ha katei ka lympung kaba heh bad ka jinglah jong ki ban wanrah ka burom ia ka distrik baroh kawei watla ia kane ka distrik dang shu ioh shen.
“Watla ngi dang dei ka distrik kaba rit hynrei phi la lah ban ïalehkai bha bad paw ruh ha kane ka lympung kaba heh. Nga kitbok ia phi baroh ba phin lah shuh shuh ban ïalehkai kham bha ha kiwei pat ki lympung ki ban sa wan” ong u Bah Renikton.
