Hynne ka sngi ka 26 tarik Rymphang 2025, u Myntri Rangbah ka jylla Conrad K. Sangma u la pynlong da ka program ba kyrpang ban pynkup burom ia baroh ki nongialehkai kiba la khur takma ha ka lympung National Games kaba dang shu kut shen ia kaba la pynlong ha ka jylla Uttarakhand.
Kitei ki samla kiba la shah pynkup burom ki kynthup ia u samla Pynshngaiñ Kurbah, Vikash Rana, Indra Sharma, Elizabeth Vincent, Kiran Devi, bad N.Anandbhi. Nalor kata, la pynkup burom ruh ia u coach Ian Vincent uba la ialam ia kitei ki samla sha ka jingjop don burom ha katei ka lympung kaba heh.
La pynkup burom ruh ia ki skul bapher bapher ba la wanrah burom ia ka Jylla ha ka kam ïalehkai kynthup ia ki nongialehkai shimet, ka klob phutbol Shillong Lajong FC kaba dei ka klob kaba la pynpaw nam ia ka Jylla ha ka liang jong ka phutbol bad kiwei kiwei ki nongialehkai.
Haba ai jingkren ha kane ka program, u MR u la ong ba ka Sorkar ka la shimkhia bad ialehkai ban treikam sted bha naduh u snem 2018 ban saiñ dur shuh shuh ia ka kam ïalehkai da kaba pynbiang ruh ia ki jaka ïalehkai na ka bynta ban pyntikna ba ka kam ïalehkai kan kiew ha ka jylla.
Shuh shuh u la ong ba ka jylla ka la ioh sa kawei ka burom, kata ia kaba yn pdiang bad pynlong (host) ia ka National Games ha u snem 2027 ha kane ka Jylla ka ban long ruh kum ka jingai mynsiem ia ka Sorkar Jylla ban shim khia shuh shuh ha ka kam ïalehkai. U la pynthikna ruh ba ia ki jaka ïalehkai yn dang iai bteng shuh shuh ban pynbha nangne sha khmat ba ki nongialehkai kin mad ia ka jingiaid lynti ki ban pynsah kynmaw haba kin shim bynta ha ki jingïalehkai bapher bapher.
U Myntri Rangbah u la kular ruh ba ka Sorkar Jylla kan ai ia ka jingkyrshan ba pura ia ki kynhun bad ki seng bapher na ka bynta ban pynkhreh ia kane ka lympung kaba heh ia kaba yn pynlong ha kane ka Nongbah.
Ha kane ka sngi la pyllait ruh ia “Meghalaya Action Plan 2025-32” bad ka “Chief Minister Football Mission” na ka bynta ban kyntiew ia ka kam ïalehkai bad ka lawei ha ka jylla.
