Ha ka thong ban ailad ia ki khynnah ban pyni bor ha madan nalor ka kam pule kot hapoh ki kamra klass, ka School Managing Committee jong ka Seinraij LP & UP School Mukhap, Laskein Block ha ka 5 bad 6 tarik Lber ka la pynlong ia ka Annual School Sports Meet 2026.
Ha kane ka Annual School Sports Meet la iashim bynta da ki khynnah skul ha ki jingiakop bapher bapher kynthup naduh kiba pule ha ka class Nursery haduh kiwa kiba pule ha ka class VIII.
Ia kane ka Annual School Sports Meet jong une u snem la wan ban pynhap pyrda da u ma Rikut Parien, MDC Saphai kum u kongsan ha ka jingiadonlang u Rangdajied Lapasam, Waheh Shnong ka Mukhap, ki rangbah, ki longkmie nalor ki dkhot jong ka Managing Committee, ki nonghikai bad ki kmie ki kpa jong ki khynnah skul.
Ha ka jingialang pynkut jong kane ka Sports Meet ha ka jingpyniaid u ma Teibor Papang, Chairman SMC la ioh ia ka jingnguhblei da ka Darihun Papang, Asst. Teacher bud sa ka jingkren ai mynsien ia ki khynnah skul da u Rangdajied Lapasam, Waheh Shnong Mukhap kumjuh ruh ki kyntien sneng kyntien kraw na u ma Rikut Parien, MDC Saphai u kogsan jong kane ka Meet, katba ka Kheinkor Niang, Head teacher Seinraij LPS SSA Mukhap ka la ai ia ki kyntien aikhublei.
U Rikut Parien ha ba kren u la iaroh ia ka Managing Committee jong kane ka skul kaba la lah ban pynlong ia kane ka Sports Meet na kawei ka snem sha kawei pat, u la ong ruh ba kane baroh ka lah ban long dei namar ka mynsiew jong ka jingiatreilang, kumta ula kitbor kitrwiang ruh ia ki khynnah skul khnang ba kin nang lah shuh shuh ban wanrah ia ka nam bad ka burom jong ka skul, ka shnong nangne shakhmat lyngba ki kam ialehkai sport bapher bapher.
