Jowai: Ki bor pynïaid ka West Jaiñtia Hills District Wushu Association (WJHDWA) ha ryngkat ka jingïatreilang bad ka ophis u District Sports Officer, West Jaintia Hills shi bynta ban pynkiew ïa ka jingïalehkai Wushu hapoh ka District, ha kane ka 12 bad ka 13 tarik u Nailur kila pynlong ïa ka 2nd West Jaiñtia Hills District Level Wushu Championship 2025 ha Hall jong ka Jowai Presbyterian School kaba don ha Lion Mission Compound.
Ha kane ka jingïakop la wan ban ïashim bynta da ki khynnah bad ki khun samla na ki shnong bapher bapaher jong ka District bad ka jingïakop kala long kaba itynnad bad kaba shongshit hapdeng ki nongïalehkai kiba wan ïashim bynta bad ki nongwan peitkai.
Na ka liang u ma Wailadmiki Shylla, MLA Jowai Constituency ha ka jingkren ula ai mynsiem ïa ki nongpynïaid bad kumjuh ïa ki nongïashim bynta baroh, ula pynsngew ba ka sorkar kala mang kyrpang na ka bynta ki nongshong shnong kiba wanrah burom ïa ka jylla ha ka jingïalehkai Sports.
Kum ka dak ban ai mynsiem shuh shuh ïa kane ka seng na ka liang u MLA ula ai jingïarap haduh T.20,000/- tyngka sha ka West Jaiñtia Hills District Wushu Association.
Na ka liang u President ka Meghalaya Wushu Association ula pynsngew sha ki nongwan ïashim bynta lyngba kane ka Championship, ka Association kan jied ïa ki khynnah ban mihkhmat ïa ka jylla sha ka jingïakop ka ban long ha Jammu-Kashmir bad kan don ruh ka Inter School Championship.
