U Bah Shakliar Warjri, Myntri ba khmih ia ka Tnad ïalehkai (Sports) ha ka Jylla u la kam ba ka jingthmu ban ailad bad ai kabu ban pynlong ia katto katne ki jait jingialehkai National Games 2027 ha ki jylla kiba don hapoh jong ka thaiñ Shatei Lam Mihngi (North East) ka dei na ka jingbthah bad mynjur jong ka Sorkar pdeng kaba la rai ha ka jingialang ba dang shen.
Haba tih bniah halor kane, u Myntri u la kam ruh ba katei ka jingailad sha katto katne ki jylla ha ki thaiñ North East (NE) kam dei ruh na ka jingbym biang ki jaka ialehkai ne ki jingbym lah ban tei ia ki ïing kiba paka na ka bynta ban pyndonkam ia ka National Games 2027.
“Ha kaba iadei bad ki jingdonkam na ka bynta ki madan bad ki ïing ban ialehkai, ngim donkam ban khuslai namar ngi la pynkhreh bha, hynrei ka daw hi ka dei na ka jingbthah jong u Myntri Sorkar pdeng ban ai bynta lang sha katto katne ki jylla kiba don ha NE”.
U Bah Shakliar u la pyntikna ruh ban pyndep noh ia baroh ki jingdonkam ha shwa ka National Games walta don katto katne ki jingtei kiba dang iaid mynta bad don ruh kiba khlem pat ioh ban sdang haduh mynta.
Haba twad jingmut ha kaba iadei bad ki jait jingialehkai kiba yn sa pynlong ha kylleng ka jylla, u Myntri u la ong ba ka Tnad hi ka la dep ban thung katto katne ki komiti na ka bynta ban phiah ia ki jait jingialehkai ha ki distrik bapher bapher kynthup ruh ia ka SAI ha NEHU lada i donkam.