Ka Shillong Lajong FC ka la ioh ban rah ia ka nam lahduh jong ka Shillong Premier League 2024-25 hadien ba ka lah ban pynliem noh ia ka Mawlai Sports Club da 2-1 kol ha ka jingialehkai kaba long mynta ka sngi.
Haba phai sha ka jingialehkai ka long kaba itynnad ha kaba ka Shillong Lajong FC ka la ioh ban lam khmat da 1 kol ha ka minit kaba 10 bad la thep da u Abhay Chettri, ha ka First Half jong ka jingialehkai.
Haba phai sha ka 2 half ka jingialehkai ka long kaba itynnad ha kaba ka Shillong Lajong ka la ioh ban lam khmat biang sa 1 kol ha ka minit kaba 76 bad la thep ia ka kol da u Samshaphrang Lato, bad pynlong ia ka Lajong ban tam da 2 kol – 0 ia ka Mawlai, ha shwa ban kut ka jingialehkai ka Mawlai Sports Club ka la ioh ban pynphai kylla 1 kol ha ka minute kaba 88 lyngba ka penalty bad ka Mawlai SC ka la ialeh tyngeh ban pynphai biang hynrei da ka jingtbit u rang ap kol ka Shillong Lajong, ka Mawlai SC ka la hap mad noh ia ka nam rem bad pynlong ia ka Shillong Lajong FC ban rah syndon ia ka nam lahduh da ka 2- 1.
Ka Shillong Lajong FC ka la ioh ia ka song pisa kaba 6 lak tyngka bad ka Mawlai kaba la wan ba ar ka la ioh ia ka song Pisa kaba 3 lak tyngka bad ia kine ki khusnam la sam da u Myntri ba peit ia ka tnad ialehkai ka Sorkar Jylla u Bah Shakliar Warjri, ha ka jingiadon ryngkat lang ki Nongpyniaid jong ka Shillong Sports Association bad ki Nongkitkam ka Meghalaya Football Association.
La sam ruh ia khusnam top Scorer jong ka Shillong Premier league 2024-25 ha kaba la ioh da u Player ka Shillong Lajong FC u ba la ioh ban thep haduh 19 kol.
Na ka liang u Myntri ka tnad ialehkai jong ka Sorkar jylla u Bah Shakliar Warjri u la pyntip kum ka dak ban kyrshan ban kyntiew ia ka kam ialehkai football ha ka Jylla ka Sorkar ka la noh synniang 8 lak tyngka sha ka Shillong Sports Association.
