Ka Byndihati SC kala long ka lahduh haka jingïalehkai phutbol jong ki kynthei bala pynïaid da ka East Jaiñtia Hills District Football Association (EJHDFA) kaba la tip kum ka Women’s League 2025 kaba la long mynta ka sngi Saitjaiñ 20 tarik u Nohprah ha madan Artificial Turf, Diengshynrum, Khliehriat East Jaiñtia Hills District.
Haba phai sha ka jingïakhun Final hapdeng ka Byndihati SC pyrshah ïa ka Dkhiah West SC kala long kaba ïakhaid bha bad khlem don satia kiba ïoh ban thep kol (0-0) kata naduh ka jingïakhun jong ka kylla step, haduh ka kylla miet bad ka jingïakhun jong ka Extra Time.
Kumta naka liang ki bor pynïaid kila hap ban pynïakhun noh da ka jingïashut Tie Breaker ban rai ïa ka nongjop, kumta ka kynhun Byndihati SC kala jop da 4-3 kol ïaka Dkhiah West SC lyngba kane ka jingjop ka Byndihati SC kala long syndon ka lahduh mynta ka snem.
Ha kane ka jingïakhun Final la wan ban donlang da u kongsan ma Mehiwot Shadap uba dei ruh u Working President ka EJHDFA, ha ryngkat ka jingdonlang u General Secretary ma James Sutnga lem bad ki dkhot bad ki nongkitkam ka Youth Development Committee.
Ïa ka nam Best Player jong kane ka lympung la ïoh rah da ka Makrisha Songthiang, ka nam Best Goalkeeper la ïoh da ka Priyanka Latam kine baroh ar ngut ki dei na ka Byndihati SC.
