Ka Ummulong CC kala ïoh rah ïa ka nam lahduh ha ka jingïalehkai District Cricket League 2025 bala pynïaid da ka West Jaiñtia Hills District Cricket Association (WJHDCA) da kaba pynliem ïa ka Mowkaiaw CYC, ha ka jingïakhun Final mynta ka sngi Balang ha 28 tarik u Jymmang 2025 ha Mini Stadium, Khliehtyrshi.
Haba phai sha ka jingïalehkai Final ka Ummulong CC kala jop da 4 wickets, ïa ka jingkynting toss la jop da ka Ummulong CC kaba la kam trai ban bol shuwa. Ka Mowkaiaw CYC haba leit tied nyngkong, ka lah ban kamai 102 runs na ki 20 ober bad liem 9 wicket. Napdeng ki nongtied jong ka dei tang u Kishan lyngdoh marwei u ba ïalehkai bha, u la tied 61 runs na ki 50 balls ryngkat 5 tylli ki Six bad 4 tylli ki Fours. U Heimonlang Lyngdoh, nongkawang ball jong ka Ummulong CC u la ïoh ban pynhap 3 wickets na ki 4 ober bad u ai tang 5 runs.
Ka Ummulong CC ha ka pali jong ka ban beh ïa ka thong, ka la lah ban pynjop da ka ba kamai 105 runs na ki 18.3 ober bad liem 6 wickets. U Sylvester Mylliempdah u la tied 37 runs (khlem out) na ki 52 bol ryngkat 3 tylli ki Fours, u Chongtre I Man Lamare pat u la noh synniang 28 runs na ki 17 bol ryngkat 3 tylli ki Six bad kawei ka Four. U Kitboklang Lyngdoh, nongkawang bol jong ka Mowkaiaw CYC u la ïoh ban khyrwit 3 wickets na ki 4 ober, u Kishan Lyngdoh pat u la ïoh ban khyrwit 2 wicket na ki 4 ober.
Ïaka Nam Player of the Match mynta ka sngi la ïoh ban rah da u Heimonlang Lyngdoh jong ka Ummulong CC u ba ïalehkai bha ha ka jingkawang bol. La sam ruh ïa ka Nam Best Batsman jong kane ka League ha ka ba u Devention Lyngdoh (235 runs na ki 6 innings) jong ka West Jaiñtia Police CC u la ïoh ïa kane ka Nam da ka ba ïoh bun run eh na baroh ki Nongtied ha kane ka League. Ïa ka Nam Best Bowler la ïoh rah da u Heimonlang Lyngdoh (19 wickets na ki 7 innings), u nongkawang bol jong ka Ummulong CC u ba ïoh ban pynhap bun wickets ha kane ka League. La sam ruh ïa ka Nam Player of the League ha kaba u Devention Lyngdoh jong ka West Jaiñtia Police CC u la ïoh ïa kane ka Nam.
Ïa ka Closing Ceremony mynta ka Sngi la wan ban pynhap pyrda da u ma Eddystone Shylla, u President jong ka West Jaiñtia Hills District Cricket Association uba la sam ruh ïa ka Trophy cha ka Champion Team. La ïadon ryngkat ruh u ma Arwotki Sumer bad u ma Issaia Muksor, Vice-Presidents jong ka West Jaiñtia Hills District Cricket Association, u ma Waiborlang Sohlang, u General Secretary jong ka West Jaiñtia Hills District Cricket Association bad kiwei de ki Dkhot jong ka WJHDCA.