Ka lympung ïalehkai phutbol bala pynïaid da ka Football Committee jong ka Sports and Youth Sub Committee ka WJSU, ïa kaba la tip kum ka ‘First War Jaiñtia Invitation Football Tournament 2025’, kaba la long mynta ka sngi 7 tarik haka jingïakhun 1st Semi Final ka long hapdeng ka Amlarem Social Club, Warjaiñtia region pyrshah ïa ka Lamyrsiang Sports Club, Saipung Block Area.
Haba phai sha ka jingïalehkai bala pynlong ha madan Amshipai, Amsohkrut Amlarem Civil Sub-Division, na ka liang ka kynhun jong ka Amlarem Social Club, War Jaiñtia kala lah ban pynliem ïa ka Lamyrsiang Sports Club, Saipung region da 2-0 kol. Ïa ka kol ba nongkong la ïoh ban pynkhih jar da u Tip Rasmut Jersey No. 11 ha ka minit 58 bad ka kol kaba bud la ïoh ban pynkhih jar da u Iaiddakyrmen Jungai jersey No. 9 ha ka minit 78 jong ka Amlarem Social Club.
Na ka liang ka Lamyrsiang Sports Club kala ïaleh tyngeh ban pynphai ïa kine ki kol ka Amlarem Social Club, hynrei ki rang nongïaleh kai ka Amlarem Social Club kim ai lad satia bad da kine ki ar kol ka Amlarem Social Club ka lah jam sha ka Final jong ka First Warjaiñtia Invitation Football Tournament 2025 ka ban sa long ha ka 17th May, 2025.
Ka jingïalehkai 2nd Semi Final kan long hapdeng ka Padu United Sports Club, ka Champion Second Division ka ASSA pyrshah ïaka Syndai Pyllun SC, Select Team ka ban long ha ka 10th May, 2025 haka por 2:00 pm ha kane ka juh hi ka madan bol.
Kat kiba jop ha kane ka jingïalehkai haka 10th May 2025 hapdeng ka Syndai Pyllun SC bad Padu United kin ïa ai reng ban ïaknieh ïa ka nam lahduh ka First Warjaiñtia Invitation Football Tournament 2025 pyrshah ïaka Amlarem Social Club.
Na ka liang ki bor pynïaid jong kane ka lympung kila kyntu jur ïa ki paidbah nongshong Shnong ka War Jaiñtia bad ïa kiwei de kiba don hapoh ka bri u Hynñiewtrep ban ïawan sakhi lang ïa kane ka lympung khnang ba ki jingthmu ba bha ka seng kin long kiba jop bad ba seisoh.