Ka lympung ïalehkai phutbol jong ka kyrdan 1st Division League 2025 bala pynïaid da ka East Jaiñtia Hills District Football Association (EJHDFA) kaba la long mynta ka sngi 6 tarik u Risaw haka jingïakhun Semi Final ha madan Artificial Diengshynrum, Khliehriat.
Haba phai sha ka jingïakhun Semi Final ba nyngkong kala long kaba ïakhaid bha da mar 2-2 kol hapdeng ka kynhun Byndihati CSC bad ka Musniang SC, ïa ki kol na ka Byndihati CSC la thep da u Bhalangme Tariang haka minit ba 24 bad u Tenligent Dkhar haka minit ba 52. Katba ïa ki kol na ka Musniang SC la thep da u Eleven Biam haka minit ba 76 bad u Nikerda Dkhar haka minit ba 90.
Hadien ka jingïakhaid la pynïakhun noh da ka jingïashut Tie Breaker ha kaba ka Byndihati CSC kala jop da 5-4 kol ïaka Musniang SC. Lyngba kane ka jingjop jong ka Byndihati CSC kala ïoh ban rung sha ka phainal jong kane ka lympung, da kaba ïoh ruh ban kiew sha ka kyrdan Super Division ha u snem ban wan.
Ka jingïakhun Semi Final ba ar kan long lashai ka sngi 7 tarik hapdeng ka Rymbai Synrang Shahkhaiñ SC pyrshah ïaka Wahiajer Narpuh SSC haka por 2 baje nohphai sngi.
