Ka Mowkaiaw CYC kala ïoh ban rung sha ka Final jong ka District Cricket League 2025 bala pynïaid daka West Jaiñtia Hills District Cricket Association (WJHDCA) da kaba pynliem 14 runs ïa ka West Jaiñtia Police CC mynta ka sngi ha Mini Stadium, Khliehtyrshi.
Haba phai sha ka jingïakhun Semi Final mynta ka sngi 15 tarik u Jymmang, ïa ka jingkynting toss la jop da ka Mowkaiaw CYC kaba la kam trai ban tied nyngkong. Ka Mowkaiaw CYC haba leit tied nyngkong kala tied 101 runs na ki 20 overs bad liem 8 wickets. U Todan Rymbai ula tied 22 runs na ki 15 bol ryngkat kawei ka Six bad lai tylli ki Four, u Kitboklang Lyngdoh ula tied 21 runs na ki 25 bol ryngkat lai tylli ki Four bad u Bundaki Lynthong pat ula tied 20 runs na ki 15 bol ryngkat kawei ka Six bad kawei ka Four. U Dabiang Marwein bad u Loverist Langbang, nongkawang ball jong ka West Jaiñtia Police CC ki la ïoh ban khyrwit mar 2 wickets na ki 4 overs.
Ka West Jaiñtia Police CC ha ka pali jong ka ban beh ïa ka thong, kam shym la lah ban pynjop bad ka lah ban kamai tang 87 runs na ki 20 overs bad duh noh 9 wickets. U Bishal M Sangma ula ïoh 17 (10), u Sauni Nongtdu 12 (12) bad u Devention Lyngdoh 12 (32) kiba long tang maki lai ngut napdeng ki nongtied jong ka West Jaiñtia Police CC kiba lah ban kamai ar dak. U Sanvert B Kurkalang bad u Kitboklang Lyngdoh, nongkawang bol jong ka Mowkaiaw CYC ki la ïoh khur mar 3 wickets na ki 4 overs.
U Kitboklang Lyngdoh u ba ïalehkai bha ha ka bat bad ka jingkawang bol u la ïoh ban khur ïa ka Nam Man of the Match.
Ka jingialehkai Semi Final ba ar kan long ha ka sngi Saitjaiñ 17-05-2025, hapdeng ka Ummulong SC pyrshah ïa ka Mupliang SC naduh ka por 8 baej shiteng mynstep.