Ka Ummulong CC kala ïoh ban rung sha ka Final jong ka District Cricket League 2025 bala pynïaid daka West Jaiñtia Hills District Cricket Association (WJHDCA) da kaba pynliem 6 Wickets ïa ka West Jaiñtia Police CC mynta ka sngi Saitjaiñ ha Mini Stadium, Khliehtyrshi.
Ha ba phai sha ka jingïakhun ïa ka jingkynting toss la jop da ka Ummulong CC kaba la kam trai ban bol nyngkong. Ka Mupliang SC haba leit tied nyngkong, ki nongtied jong ka kim lah ban ïalehkai bha na ka daw ka jingtbit pynhap bol ki nongkawang bol jong ka Ummulong CC bad ki shem shitom sha ba palat ban shna run, baroh ki lah ban tied tang 56 runs bad liem lut baroh ha ka overs kaba 17.3. U Oniwanker Sna uba tied 13 runs na ki 22 bol ryngkat kawei ka Four bad u Sandy Kharshandi uba tied 10 runs na ki 21 bol ki dei tang ma ki arngut kiba poi 10 run shaneng. U Heimonlang Lyngdoh bad u Carefully Gassah, nongkawang ball jong ka Ummulong CC ki la ïoh ban khyrwit mar 3 wickets.
Ka Ummulong CC haka pali jong ka ban beh ïa ka thong, kala lah ban poi sha ka thong da kaba kamai 60 run tang na ki 5 overs bad duh noh 4 wickets. U Sylvester Mylliempdah ula tied 16 run na ki 12 bol ryngkat lai tylli ki Four bad u Rejoice Gassah ruh ula tied 16 run na ki 7 bol ryngkat iwei I Six bad ar tylli ki Four. U Defender Dhar bad u Sandy Kharshandi, ki nongkawang bol jong ka Mupliang SC ki la ïoh ban khur mar 2 wickets na ki 2 overs.
U Heimonlang Lyngdoh, u nongïalehkai jong ka Ummulong CC uba ïalehkai bha ha ka jingkawang bol bad ap fielding ula ïoh ban khur ïa ka Nam Man of the Match.
Kum ban pynkynmaw ha ka Semi Final ba nyngkong, ka Mowkaiaw CYC kala pynliem ïaka West Jaiñtia Police CC da 14 runs bad ïoh rung sha ka Final.
Kumta ka jingïalehkai Final kan long hapdeng ka Mowkaiaw CYC pyrshah ïa ka Ummulong SC (kaba dei ruh ka Champion jong u snem 2024) ha ka sngi Balang (Wednesday) jong ka 21-05-2025 naduh ka por 9 baje mynstep.