Ka Meghalaya Football Association hapoh ka jingialam jong u Bah Hamlet Dohling – President, ki la pynlong ia ka program kaba kyrpang kaba dei kum ka jingai mynsiem bad pynshlur na ka bynta ki khynnah ialehkai ki ban mihkhmat ia ka Jylla sha ka lympung Junior Boys’ National Football Championship 2025 (Tier 1) na ka bynta ka Dr. BC Roy Trophy ia kaba yn pynlong ha Amritsar, Punjab.
Ha kane ka program ban ai mynsiem ia kitei ki khynnah ialehkai, la don ryngkat ruh Vice President ka MFA, Bah Cliff Nongrum, Bah Freddy Kharpran (Executive Member), ki samla ialehkai Senior bad kiwei kiwei.
Na ka liang u President jong ka MFA, u don ka jingngeit bad ka jingkyrmen kaba skhem ba ka kynhun kan lah ban ialehkai bha khamtam ban wanrah ka nam jop kaba long ka burom ia ka Jylla.
Ka Meghalaya ka la don ha ka Group C kaba kynthup ia ka West Bengal kaba dei ka lahduh jong ka samoi ba lah dep, Kerala bad Tamil Nadu.
Ka MFA ka la jied 20 ngut ki khynnah na ka bynta katei ka lympung kaba kynthup ia u Danehskhem Ronghang, Dasuk Banphrang Diengdoh, Skhemlang Marthong, Medonbanshan Kurkalang, Robindor Kyrsian, Venand Brandon Marboh, Baniar Kharsahnoh, Mewanpyntngen Lyngkhoi, Prosperwell Ryntong, Yeomanlyson Shadap, Shanborlang Khongjee, Melvinstar Lyngdoh Nongbet, Clifford Buam, Marc R Marak, Alvin Kharbani, Chanjib Chetry, Aiborlang Mulieh, Seibok Lyngdoh, Aryan Nongkhlaw, Thrisilbirth A Sangma. Nalor kitei, la synran ruh ia ka kynhun da u Bah Seibor Sana (head coach), Henry Marboh (assistant coach), Banshailang Sohtun (manager), Diangtihun Kharkongor (physio).
Ka Meghalaya kan sdang ia ka jingiakhun pyrshah ia ka Kerala ha ka 21 tarik mynta u bnai, bteng pat ha ka 23 tarik pyrshah ia ka West Bengal bad 25 tarik pyrshah ia ka Tamil Nadu jong une u juh u bnai.
