Ka Sorkar Jylla lyngba ka tnad Meghalaya Sports and Youth Affairs (MSYA) hynne ka sngi ka la pynlong da ka program na ka bynta ban ai mynsiem ia ki samla ïalehkai jong ka kynhun Myngken Christian Higher Secondary School, Bhoirymbong (U-17) ha shwa ba kin mih na ka Jylla na ka bynta ban leit ïakhun sha ka lympung Indo-French Football Tournament ha Paris, France.
Ia kane ka lympung yn sdang naduh ka 24 tarik bad kut haduh 30 tarik Lber 2025. Ka jingioh kabu kane ka kynhun ban leit ïashim bynta sha katei ka lympung baheh ka dei na ka jinglah ban ïalehkai bha ha ka lympung 63rd State Level Subroto Mukherjee cup, 2024.
Ka jingshah jied ka Myngken School na ka bynta ban ïashim bynta ha katei ka lympung bad ban mih khmat iabka India ka la long ka jingkyrkhu ia ki samla ïalehkai bad ka burom ia ka Jylla baroh kawei.
Ia katei ka program ba la pynlong kyrpang na ka bynta kitei ki nongialehkai la pynlong ha Centre Point Hotel, Shillong ha kaba la don ryngkat da u President ka MFA Bah Hamlet Dohling, Bah Larsing M.Sawian uba dei ruh u trai jong ka klob ba paw ha ka jylla, ka Shillong Lajong FC, ki nonghikai ka skul Myngken, ki ophisar bad kiwei kiwei.
Haba ai jingkren ha kane ka sngi, na ka liang u Bah Hamlet u la ïaroh nyngkong ia kane ka kynhun ba ka la lah ban trei shitom bad kynnoh sha kane ka thong. “Ai ia kaba bha tam, wanrah sha ïing ia ka trophy bad pynsngewsarong ia ngi baroh” ong u President ka MFA.
Katba na ka liang u Bah Sawian, u la pynpaw ia ka jingsngewburom ia kane ka kynhun khamtam ia ki samla na Ri Bhoi kiba na ka por sha ka por ki la wanrah burom ia ka Jylla ha kiba bun bynta ki jait jingialehkai kiba la pyndonkam ruh ia ka sap ryngkat ka jingpule ha kajuh ka por ba ki hap ban pyndep. U la pynpaw ruh ia ka jingsngewkmen ba ka kynhun ialehkai phutbol jong ka India ka wan ban ïalehkai ha kane ka Jylla ha ka sien ba nyngkong eh. U la ai Khublei ruh ia u Bah Hamlet ba u la shim khia bad leit pynkhih ia ki dkhot ka All India Football Federation (AIFF) na ka bynta ban wanrah ia ka jingialehkai ka India ha kane ka Nongbah.
Kano kano ka kynhun ka ban jop ha kane ka lympung kan ioh ban khur ia ka song Pisa bad yn ioh ruh ia ka kabu ban ioh hikai (training) lang bad kawei na ki klob ba paw ha ka pyrthei (professional) haduh shi taiew lynter.
