Khyndiat bnai mynshwa ka Indian Olympic Association (IOA) ka la pyntikna ba ka National Games kaba 39 ia kaba yn pynlong ha kane ka jylla kan sa sdang naduh u bnai Rymphang haduh Lber 2026. Ha shwa ban kut kine ki 6 bnai, ka tnad Meghalaya Sports Association (MSYA) ka dang pynkhreh shaid shaid na ka bynta ban sei ia ki snar ïalehkai ki ban ïashim bynta ha katei ka lympung kaba heh ha kaba baroh ki Jylla na India kin sa wan ban ïashim bynta.
Ka IOA ka pynpaw ia ka jingkyrshan kaba pura na ka bynta ka jylla Meghalaya ka ban pdiang (Host) ia kane ka lympung kaba heh ha ka sien ba nyngkong. “Ngi don ia ka jingtikna ba ka Meghalaya kan ieng na ka bynta kane ka lympung ban pynioh ruh ia ka jingpynkhreh kaba seisoh bad ki jingialehkai ki ban sah kynmaw” ong ka President jong ka IOA ka P.T. Usha.
Ha kane ka kynti ka tnad MSYA hapoh ka shatri jong ka All Meghalaya Karate Do Association (AMKA) ka la bteng ia ka jingpynkhreh bad naduh ka 1 tarik Naitung la sdang ia ka program ban ïit bad hikai ia ki samla donsap ha ka jingialehkai Karate bad lyngba ki program ba la pynlong ha ki district bapher la ioh ban sei haduh 80 ngut ki nongialehkai, kata 40 kynthei bad 40 ngut ki shynrang.
Ia kitei ki nongialehkai ba la shah jied na ka bynta ban ïashim bynta ha ka lympung National Games la hikai lane coach da u Bah Banshanlang Kharumnuid, Bah Donboklang Lyngdoh ryngkat bad ka jingiarap (Assist) jong u Bah Mingson Rymbai bad Bah Edwilbert Nongkynrih.
