Haduh 28 tylli ki skul napoh ka West Jaiñtia Hills District kila wan ban ïashim bynta haka ‘District Level Inter School Athletic Meet 2025’ kaba lai sngi lynter, ïa kaba la sdang naduh mynta ka sngi Balang bad pynkut haka 25 tarik ha madan Kiang Nangbah Stadium, Dongmihsngi, Jowai.
Ïa kane ka lympung ïalehkai Sports (Athletes) jong ki khynnah skul la pynlong da ka ophis u District Sports Officer, Jowai ha ryngkat ka jingïatreilang bad ka West Jaiñtia District Sports Association (WJDSA).
La wan ban plie pyrda ïa kane ka Inter School Athletic Meet da ka kong A. P. Syiem kaba dei ruh ka Joint Director School Education & Literacy jong ka sorkar jylla. Haba ai jingkren sha baroh ki nongwan ïashim bynta (Athletes) kala pynsngew ïa ka jingdonkam jong ka jingïalehkai Sports haka jingim khamtam ïa ka lawei jong ki khynnah.
Shuh shuh kala ong ka jingpynlong ïa kum kane ki jingïalehkai kan ïarap shibun eh ïa ki khynnah ba kin ïoh ban pynpaw pyrthei ïala ki sap ki phong ba ki don, haka juh ka por ka ai ruh ka jingkitbok kitrwiang ïa baroh ki khynnah ba kin ïalehkai bha, namar haka jingïakhun ki don beit kiba jop bad kiba rem.
Kum ka Joint Director School Education & Literacy ka pynpan ka jingsngew sarong halor ka jingwan ba shakhmat eh ki khynnah skul ka District ha kane ka result SSLC kaba dang shu dep pynbna da ka MBOSE.
Kala kitbok kumjuh ïa ki nongjop hadien kane ka District Level Inter School Athletic Meet kin ïoh ban leit mihkhmat ïaka District sha ka State level Athletic Meet kaba ban sa long ha u bnai ban wan.
Ha kane ka sngi sdang la wan ban donlang da u ma K. Passah, District Sports Officer, u ma P. Lamare, Vice President, WJDSA uba la ai ruh ki kyntien ban plie pyrda ïa kane ka District Level Inter School Athletic Meet, nalor ki nonghikai bad ki khynnah skul.
