Ka lympung ïalehkai phutbol ha ka kyrdan 2nd Division League Stage 2025 bala pynïaid da ka East Jaiñtia Hills District Football Association (EJHDFA) kala sdang mynta ka sngi 16 tarik ha madan Artificial Ground Diengshynrum, Khliehriat.
Ïa kane ka lympung la wan ban plie pyrda da u kongsan ma Joshwa Sajem uba dei u Vice President ka EJHDFA uba la ai sngewbha ruh da ki sopti sha baroh ki Referees, ha ryngkat ka jingdonlang nongkitkam naduh u ma Mehiwot Shadap Working President, u ma James Sutnga General Secretary bad ki member ka Association.
Haba phai sha ka jingïakhun kaba nyngkong ka Mulieh YWSC Suchen kala jop da 2-0 kol ïa ka Moosianglamare New YWOSC, ïa ki kol na ka Mulieh YWSC Suchen la thep da u Piles Sumer ha ka minit ba 9 bad u Firterjoy Pariat ha ka minit ba 13.
Ha ka jingïakhun ka ba ar hapdeng ka SWO Moosianglamare Old SC pyrshah ïa ka Moolamanoh SC kila poi sha ka jingïakhaid da mar shikol 1-1. Ïa ka kol na ka SWO Moosianglamare Old SC la thep da u Primi o Muksor ha ka minit ba 39. Ïa ka shikol na ka Moolamanoh SC la kum thep bakla da u Pressamla Syrti (OG) ha ka minit ba 78.
Katba ha ka jingïakhun kaba lai ka Lakadong Umlatdoh SSC kala jop da 2-0 kol ïa ka Dkhiah West SCSO, ïa kitei ki ar kol la thep da u John Smill Amkhloo ha ka minit ba 23 bad u Pynshaibha Amkhloo ha ka minit ba 70.
La pyntip ba ka jingïakhun kan bteng lashai ka sngi 17 tarik ha ki lai tylli ki jingïakhun.
