Ka SCA ‘B’ kala jop da 9 wickets ïaka EKHCA haka jingïakhun Semi Final mynta ka sngi 5 tarik u Jymmang haka jingïalehkai jong ka Under-16 Boys Inter District Cricket Tournament 2025 (Zone-1).
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Haka jingïalehkai Semi Final ïa ka jingkynting toss la jop da ka EKHCA kaba la kam trai ban tied shuwa. Ka EKHCA haba leit tied nyngkong, ki nongtied jong ka kim lah ban ïalehkai bha na ka daw ka jingtbit palat ki nongkawang ball jong ka SCA ‘B’ bad ki lah ban kamai tang 80 runs bad liem lut baroh 10 wickets ha ka overs kaba 22.5. Napdeng ki nongtied jong ka dei tang u Guiding Sohkhlet marwei uba kham ïalehkai bha da kaba tied 29 runs na ki 32 balls ryngkat 7 tylli ki Fours (4s). U Navneet Sah bad u Ynsanhame Tang, ki nongkawang ball jong ka SCA ‘B’ ki la ïoh ban pynhap mar 4 wickets.
Ka SCA ‘B’ haka pali jong ka ban beh ïa ka thong, ki lai ngut ki nongtied jong ka ki ba mih madan mynta ka sngi kila lah ban pynjop suk da kaba kamai 86 runs na ki 14.3 overs. U Suraj Chettri sa shisien ula pyni ïa ka sap ïalehkai jong u ha ka jingtied da ka ba tied marwei 57 runs (khlem out) na ki 46 balls ryngkat kawei ka Six (6) bad 8 tylli ki Fours (4s). U Prasant Kumar ula tied 17 run (khlem out) na ki 21 balls. U Pynkhraw Jomati, nongkawang ball jong ka EKHCA u la ïoh ban khyrwit 1 wicket na ki 2.3 ober.
Katba ka jingïalehkai Semi Final ba la pynlong mynta ka sngi ha Mendipathar pat, ka la long hadeng ka TDCA pyrshah ïaka RBDCA ha kaba ka TDCA ka la jop da 20 runs
Ka Final Match jong ka Under-16 Boys Inter District Cricket Tournament 2025 kan long haka 07-05-2025 ha madan Thad Mukhla ha ka por 8 baje shiteng mynstep hapdeng ka SCA ‘B’ pyrshah ïaka TDCA.